Charming Image - Confirmed

呢篇blog係遲左少少先打
因為返新工比較忙呀 :p

之前提過約左幾間婚紗店試下衫架嘛
原本個plan係咁o既

1:30pm            Charming Image (預計一個鐘)
2:30pm            囍‧Couple (預計一個鐘)
4:00pm            Priness Wedding
5:30pm            華麗邂逅

基本上除左Priness Weddding 我去未過之外，其他果幾間d衫我都睇過下

好準時咁去到Charming Image
因為我之前冇mark低想試d咩款
所以一去到就坐係度揀下衫款先啦
hehehe....當然要試返上次已經睇中o既晚裝啦

揀左5-6件晚裝 & 3件婚紗就開始試了
開始時係由Crystal幫手的
試左兩件晚裝之後，因為Crystal有時要辦
之後就由嘉琪幫手
基本上除左我自己揀o既晚裝之外，我媽咪見到有咩款靚都拎埋比我試
我都唔係好記得總共試左幾多套晚裝了 
晚裝大約試過 (彩藍色-2; 淺紫-1, 粉橙-1; 金色-2; 黃色-1; 白色-1)....咁上下啦
但已經有3-4套試左上身我都著得幾好睇
而且又好合我心意的
自己已經心郁郁了
可能我係果d，睇岩左就想立即決定果d人啦
(因為認為再睇又唗時間，到時又遇到間又岩心水o既又會三心兩意)
所以我係試衫中途已經call左Priness Wedding我唔會去試衫了

好啦，試完晚裝就試婚紗
第一套.....普通

第二套.
嘩....著得我好瘦同埋個款真係好靚，呢件婚紗o既手工都好精緻架
釘工重，嘉琪話呢件婚紗係最多人揀o既款之一

第三套
就係佢地放係櫥窗果件，原本佢地仲有一件掛係度比人試架
但後尾發現原來租左出街，所以佢地就除櫥窗果件比我試
呢件都著得我好瘦，而且果款亦都比較青春
嗯...我都好鐘意，原來呢件又係最多人揀o既款之一

呵呵...估唔到我咁識揀  XDDDDDDDDDDDDDD

既然都睇岩，我都無謂周圍走啦，立即同嘉琪傾下個plan
家陣我join果個standard plan再加多件晚裝
總共我有6套衫 (1-婚紗; 3-晚裝, 1-男服; 1-伴娘)
佢最多比齊頭我咋，不過算啦...因為都唔算貴
之後我仲有兩次機會揀衫 (因為我除左一件超級鐘意所以hold左期之外，其他我都冇hold)
希望到時佢地再返d再靚d o既衫啦

but....首要任務係...............我要地獄式減肥 ^^

逛逛婚紗店 (2)

今日收工要去同Jerry去旺角拎野
時間尚早，所以叫佢再陪我去睇一睇婚紗資料
今日總共去左4間婚紗店
由尖沙咀百利行到落佐敦
嘻...我都知要Jerry陪我行實熱瓜佢架o勒

首先去左百利先......主要係想睇"Charming Image" d款式
同埋睇下佢地有冇人預約試衫，冇的話我可以試下嘛 (之前打去問過sales話可以)
但去到發現已經有兩個客係度準備試了
所以我都只係拎左d資料同埋睇下款式o既相
一睇就發現佢d款式一如其他姊妹所講，同唯美主義o既款好相似
我已經心郁郁啦，再望下佢地d package
果然唔貴喎，所以立即約埋第二日試衫
之後行過隔離見到"囍 Couple"就走入去睇下，順便亦約埋試衫 ^^

以下係我對今日行過4間婚紗店o既comment:

Charming Image (漆咸道87-105號百利商業中心地下67-69號舖)
款式似唯美，著重釘工，亦比較fashion
sales都好有耐性咁介紹
價錢中等，預約試衫free任試
* 心水之一 (其實個心已經想揀呢間了)

囍 Couple  (漆咸道87-105號百利商業中心地下67-69號舖)
款式多為誇張款
價錢中等，預約試衫free任試一個鐘

Vanesse L. Couture (1B Kun Lock Building, 178 Nathan Rd, TST)款式多為歐洲款，真係大部份都好靚
sales話佢地係舖o既款都只作試身用
所有款式都可以揀，唔會因你bd當日有人book左就冇
(如遇到客人於同一日book同一件衫，佢地會做多件)
價錢較貴 (比唯美還要貴)，預約試衫$50/件 (通常只會同你試2-3件)
註: 試衫後立即落單，試衫費可即時回贈於訂單內

名婚紗 (佐敦彌敦道225號明珠廣場201-203室)網上好多人推介的婚紗店之一但個人覺得款式比較平庸 (個人認為)
sales都好有心機咁拎左幾件婚紗比我睇，但我都冇睇中
價錢抵，問過佢有冇得試衫，sales答我join左package後先可試

逛逛婚紗店 (1)

終於的起心肝走去行行尖沙咀婚紗街睇下資料啦
其實原來都未冇咩概念架
講真，好多款睇落去好靚
但因為每個人身型同膚色都唔同
未著過上身都真係唔知好唔好睇架嘛

約埋伴娘亞Be一齊去
由金巴利道頭開始行，基本上見一間入一間
入到每間舖我都問都好清楚架
例如有咩package、拖尾洗唔洗加錢、可以轉幾多次款.......等等
希望可以估計到個實際費用啦
依家好多婚紗舖都需要比試衫費先比你試兩至三件衫
由7點行到差唔多9點到啦
以下係我入過o既婚紗店o既Comment：

俏佳人 (金巴利道40號A地下)
sales都冇乜特別介紹，衫款都係係咁依望左兩望
價錢較貴，預約試衫$500可試5件

天作之合 (金巴利道40號2樓)
衫款可以
價錢中等，預約試衫$500 (冇講可試幾件)

妝嫁 (金巴利道40號3樓)
sales話佢地係新開o既，衫款都仲一路返緊
價錢中等，預約試衫可以free2件

華麗邂逅 (金巴利道44號2樓)
之前細妹結婚都有考慮過呢間架，衫款都幾靚
但我去呢日好多人，冇sales得閒招呼我，所以我拎左資料就走
價錢中等，預約試衫可free3件
* 心水之一

緣美典雅 (金巴利道45-47號金巴利廣場地下5號舖)
又係陪細妹試過呢間，記得佢d衫都幾特別
價錢中等，預約試衫$500可試6件
(但我記得之前細妹試過兩三件唔洗錢，所以我問sales，佢都話可以o既)

唯美主義 (金巴利道60號C地下)
細妹之前就係join呢間，自己都有朋友係度租過衫
對呢間公司o既款式都好有信心，衫款主要多水晶，手工靚
價錢中高等，預約試衫可free2件
* 心水之一

Marry Claire (金巴利道66號)
款式唔係好合我心水，所以都冇再特別詳細問details
價錢較貴，預約試衫$500可以3件

溫馨 (金巴利道69-71A號美園大廈1樓A室)
我諗好多人都識呢間公司，因為呢度出名衫多 & 價錢相宜
去到因為有試身室，sales幫我揀左3件婚紗比我試
價錢抵，但款式較為普通，可free 試2-3件婚紗 (晚裝問過唔比試 >.<)
* 如其他心水都揀唔到的話，亦會考慮呢間

註: 試衫後立即落單，試衫費可即時回贈於訂單內 (適用於所有公司)

荀崗行

有成個幾月冇去dup骨啦
所以上星期六晚我就同Jerry一齊返深圳dup骨
嘩...都唔知係咪咁多人架
專登早少少去架啦
按腳又要等.....上房又要等
上到房都仲要等技師
太誇張了

第二朝, 我地就照原定計劃
去筍崗視察下環境o勒
由羅湖商業城搭的士去
大約20蚊人民幣 (同網友所講o既一樣)
果度有兩個商場架, 我兩個都入晒
基本上, 唔係好多間賣結婚用品o既舖頭
但, 你走去其中一間都已經可以買到好多野
格下價後就打道回府啦
本來都想買少少野架 (因為覺得一場黎到嘛)
但諗下, 仲有成年幾喎, 買定晒都唔知放係邊度好
所以最後淨係買左150個細利是封 (for 喜帖用)
共30蚊人民幣 (其實應該可以平少少o既, 但因為買得唔多, 所以廢事同佢講價)
走果陣見到商場門口有巴士站直接返到火車站架
但Jerry唔多想搭咁, 所以最後都係搭的士走
回程22蚊人民幣
我諗.....都係留返下年過年後先再去過啦 ^^

Last Working Day

終於到左last day o勒
諗返先發覺, 原來呢一份工係我做得最短o既一份工 (唔計temp.果份啦)
其實我都唔係一個唔定o既人
基本上做每一份工都希望可以做得好, 做得長

起初我來到呢間公司時
我都認為自己可以係度做一段頗長o既時間
但估唔到一個金融海嘯令到公司出現好多變化
除左人工同福利上的變化外
竟然亦令身邊o既同事作720度o既改變
唉...都唔識點講

可能之前份工lunch time係分兩更
再加上工作好忙, 我經常都一個人係位食飯盒就算
好少同同事出去食飯
所以真係好close o既同事唔多
但呢度唔同, 基本上由我入黎做第一日開始
就已經有一班固定o既飯腳
每日返工最開心就係同同事食lunch果一個鐘多d
總之, 我離開呢間公司, 最最最唔捨得就係呢班朋友
雖然我新工o既office都好近佢地, 但我都明白, 始終唔係日日見
都有可能變得冇咁close...諗諗下都真係有d傷感

至於對呢間公司...........我一d留戀都冇

倒數457日

原來真係仲有漫長的日子

Wedding Bands

本來諗住下年先到big day
唔洗咁快睇戒指住先啦
但諗諗下又唔係bor
因為今年11月會去影pre-wedding photo
我都想戴住對戒指去影呀
所以呢期就係忙住周圍去睇下d款
希望8月左右可以confirm訂啦 ^^
PN我諗好多新人都會去呢間睇款 & 訂戒指的
我係婚紗展都有睇過
果日仲排晒長龍要拎籌先埋到位添
但當時咁多款只睇中兩個款
後尾我再係catalog睇中多一個款

呢對睇落去簡單d, 但我同Jerry戴上手都幾好睇

 (from PN website)

呢對我係catalog見到架, 望望下又覺得幾好睇bor, 但未試過

 (from PN catalog)

IL Regalo呢間公司係o係日本的, 佢的對戒特別之處係可以90度刻字
起初聽人講都唔係好明點為之90度刻字
所以當然去佢website望望啦http://www.kyocera.com.cn/prdct/jwely/regalo/gb/main.html
估唔到原來真係好特別架
我仲立即模擬整左一隻添
比大家睇下呀

但由於要訂造, 同埋刻字特別, 要訂造一對都唔平架
所以都仲考慮緊

黎緊我會搵日去一個uncle度睇下佢d對戒款
再睇下有冇心水先決定訂邊對 :p

終於走得甩啦

其實星期六second in果時都feel到佢有意請我架o勒
但當其時我又唔係咁想take呢個offer喎
所以都諗定個reason去reject佢
好啦, 尋日打黎再問清楚d
先發現呢份工可以比到我一個好好o既學習機會
對我將來o既career path都好有幫助
所以終於都決定走啦

idy都有留我, 但我去意已決
所以最後都好快confirm另一邊我幾時返工
最初入黎呢間公司果時覺得呢間公司幾好架
work load唔多, 同事又相處得好好喎
直至某d事情發生後, 講真, 跟本冇心機做野
日日係度hea咁
再加上又減人工又放no paid
真係唔可以捱咁多個月................

唯一最唔捨得就係日日同我lunch o既好飯腳好同事啦
但唔緊要, 我黎緊都係o係中環返工, 都仲要好近landmark添
所以想見都唔難o既

行婚紗展

本來我係約埋伴娘亞be & 媽咪一齊星期六去行婚紗展架
但因為要去second in喎，之後又約左best fd去飲茶
所以最後改期呀，改為同未來老公仔去
又估唔到佢咁"順攤"喎
一問佢一唔一齊去，佢立即話ok~~
其實今次去主要係想落訂影婚紗相
未去婚妙展之前，一早已經有心水啦
就係好多姊妹影完返黎都好多好評o既3V

之前係esdlife gather左幾位姊妹d資料
希望大家去到都可以拎到最好o既優惠
去到第一時間call佢地d staff出黎接我地入場
然後就有個staff走過黎sale我地啦
原來佢就係mua 小薇，因為其他sales都唔得閒所以由佢黎serve我
佢好nice呀，我問咩佢都答得我好清楚
仲有，有d product我用唔著，佢又幫我轉其他product喎
最後我依家join左華僑城plan
總共有4本相簿....15" (雜誌面) + 12" (水晶面) + 10" + 7"

嘿嘿.....

然後我地就轉攻其他攤位啦
主要都係睇下婚戒同埋禮服咁
pn個counter真係好誇張，要埋位睇款都要拎籌
等左差唔多成半個鐘先埋到位呀
但我地只睇中兩個款咋，唔緊要啦
仲有大把時間，再睇多d款都唔遲

咁就行左幾個鐘啦~~拎到成手都係資料
之後就去左JW食左個豐富o既buffet.....yummy~~~

first in!!!! second in!!!

呢輪又多左工見
唔知係咪我又勤力左send resume呢 ^^
依家發覺叫親我去in o既公司，規模都有返咁上下架bor
希望可以快d搵到份又穩定，又多野學o既工作啦