11月30日 (12w4d) - Father & Mother to Be

老公生日當日
我地o既小B已經夠12周啦
好開心，忍口咁耐
終於可以同大家分享
估唔到我同老公咁快就由準新人成為準Daddy Mami
依家其實都仲唔係好見肚
但食飽之後個肚腩就好圓囉
比張近照大家睇下

希望我同Jerry要加油
為將來幸福o既家庭出力呀
小B就要加油，要健康成長呀

其實我之前已經開始為小B o既成長寫blog
大家有興趣o既可以去睇返喎 ^^
我的搞怪孕記Index

11月25日 (11w6d) - 照OSCAR

今日同小B去照OSCAR
OSCAR即係"One-Stop Clinic for Assessment of Risk 早孕期一站式唐氏綜合症篩查"，過程包括：(資料來源：香港中文大學婦產科學系母胎醫學組網頁)

（1）超音波掃描
孕婦先接受認可專家負責的超音波掃描檢查，確定胎兒的周歲及大小是否適合進行OSCAR，並量度胎兒後頸皮下透明層的厚度

（2）手臂抽取血液
從孕婦手臂血管抽取約5毫升血液作妊娠性血漿蛋白-A和游離Beta人類絨毛膜促性腺激素化驗，結果會在1小時後得知

（3）電腦計算機率
運用電腦計算胎兒患有唐氏綜合症的機率，如果機率為1:180或以上，則檢驗結果為陽性（高危），低於1:180則為陰性（低危）

（4a）陽性：進一步診斷
約有5%孕婦的檢驗結果為陽性，需要作進一步診斷

（4b）陰性：患症風險低
如果檢驗結果呈陰性，表示胎兒患上唐氏綜合症的風險低，則毋須冒險接受風險較高的絨毛球活檢或羊膜穿刺術（會使胎兒流產風險增加約1%）

約左4點照
早15分鐘到瑪嘉烈登記
以往政府係唔會幫非高齡孕婦進行呢個篩查架
但由今年7月開始已經將篩查覆蓋所有孕婦
所以我可以慳返少少
等左唔夠30分鐘就先去照超聲波
幫我照o既林醫生好好人
一路同我傾計，一路幫我照
由於需要放大黎度頸皮
所以今日睇得小B好清楚
見到佢個鼻仔尖尖
今日仲活躍呀，佢不斷彈下彈下
右手好似放係個口度，我仲笑佢似食緊手指
點知林醫生話佢似打"喊路"多D喎
頸皮厚度正常，但都需要睇埋驗血報告先作準
之後出去抽血
見個姑娘有返咁上下年紀，抽血應該無難度啦
點知........SHIT~~~~~
佢捨易取難，走去抽一條幼到唔幼o既血管
插完條針抽唔到血出黎，仲係咁"隊"支針入去
搞到我好痛，忍唔住要出聲叫停
佢先叫救兵，另一個姑娘一望立即叫佢放棄呢邊啦
再抽另一隻手，原來呢邊條血管鬼咁明顯
一早佢揀呢隻手咪好囉
搞到我又冇手按住針孔喎
最後隻手瘀鬼左，好痛....好慘呀 >0<

Day 1

Day 2

唉...到Day 5我都仲未散瘀
痴線架

老公生日晚餐

上個月已經開始諗點樣同老公慶祝生日
諗左好多個晚餐地方
最後都係揀左好多人讚o既Sabatini Ristorante Italiano試下
收工約老公係灣仔碼頭等
拍拖搭船仔過去尖沙咀
係海港城影下相，再慢慢行過去尖東
去到餐廳，老公已經對餐廳o既環境讚口不絕

hahahahaha...不過佢睇完個menu話
個餐牌仲靚喎

不過又唔係成日黎
豪一豪又有乜所謂
我地分別叫左一個Appetizer，一個湯
同埋兩份main courses
咪睇佢地份量好似唔大
但...已經食到我地飽一飽

呢度有live band架，佢地會不停遊走到每張台前獻唱
呢晚都好多人係度慶祝生日
我一早同老公講冇買蛋糕比佢
因為怕兩個人食唔晒
但當甜品上場時
佢見到甜品上有個朱古力牌同蠟燭
立即好開心，問我點解會咁o既
hahaha....當然係我安排啦，唔通我唔講會有人知佢生日咩
live band過黎唱左首英文生日歌比佢
仲有一位好似大廚o既外籍人士唱意大利文o既生日歌添

整個晚餐都食得好開心
好耐冇試過兩個人食一餐飯可以食足兩個幾鐘 (buffet除外)
最後食埋餐廳送o既朱古力同cookies就埋單lu
好開心我今次無揀錯地方呀 ^^

11月23日 (11w4d)

呢日又可以去見下小B啦
今次約到一早去見醫生，咁就好啦
唔洗太過影響工作嘛 (最怕聽到微言)
今日媽咪唔得閒陪我
我自己一個去
登記後食埋早餐就係診所等
15分鐘唔夠就可以見醫生啦
傾左幾句就去照超聲波
呢日小B已經足11週3日啦
照超聲波期間
我仲見到小B腳踢踢咁，好活躍
立即由心度笑左出黎
醫生今次仲比我聽小B心跳聲添
小B已經有4.7cm長啦
同醫生預計o既週數大小相符

大家睇下小B係咪大個左好多呢~~^^
註: 右邊係頭仔

今次醫生除左開葉酸外，仲開左鈣片比我

過兩日都會再見到小B
因為要照OSCAR 啦
加油呀

老公...HaPpY BiRtHdAy

雖然已經由情人變成兩公婆
但都好想送呢首歌比你

情人Happy Birthday
再度凝望你　咀邊輕帶笑微微　對你說聲一生都想你
柔情全沒顧忌　令世間變開心地　一切呼吸都只為你

是你一天一天不經意地
為我增添增添一絲隨味
情人步進我的心屝　靜裏思憶因你起
情准我許我陪伴你　渡過一切事與非

無窮一分一刻都思想你
傾我一輩子心機
今生今世亦會記起
衷心祝你　在這天
HAPPY BIRTHDAY

Honeymoon 遊記 - Day 11 (Part I) - Manchester

Day 11 (Part I) - Manchester
住宿: Brooklands Lodge Guest House
景點:  Manchester United FC

朝聖之旅，蓄勢待發
一早食飽早餐又搬晒d行李出發
呢日天氣非常之好
就好似知道我地今日去朝聖咁
終於比返日好天氣我

Online訂左Virgin Train o既車票
只要print eticket就可以啦
好抵好抵，11磅一位咋
由Euston去到Manchester大約2個鐘左右

係車站度買左個好美味o既cake做小食

傾下計聽下歌
話咁快就到Manchester啦
唔洗講，當然去放低沉重o既行裝先啦
係車站搭輕鐵去Brooksland站

再由Brooksland站行8分鐘左右就到guest house啦
呢間guest house係由hk discuss o既 ching 介紹架
果然不錯

之後當然係出發去聖地啦
大頭蝦又再漏低野啦
我竟然行到中途先醒起唔記得拎老公張membership card喎
又折返去拎
去到Old Trafford站，有個好好o既老婆婆主動話幫我地影合照

一路行一路行

見到啦

去到時間岩岩好，仲有十分鐘就到Stadium Tour開始時間

沿途見到咩都影一餐

呢條友仔比我更加努力
大相機影，iphone又要影

呢個鐘就係紀錄住慕尼黑空難當日o既時間

送雲達沙一個good = =b

出到發夢都想黎o既球場啦...好靚好靚
奧脫福球場可以容納76,000
暫時係全英超容納最多球迷o既球場
我問過tour guide，佢地o既草皮係唔會成日起架
呢家呢幅，無記錯好似用左8年了

場外o既賭波資訊

然後就參選球員更衣室
唔洗擔心，係無臭汗味o既，我地件件衫都有影架

老公最愛o既朗尼呀 ^^

到達球員通道啦
由於呢日有一班小學生同埋我地一齊參觀
所以大家好熱鬧咁排好隊等出場
出場前，我地見到有個小朋友不停咁做掌上壓
初頭唔知佢咩事，後來先睇到佢原來係度親吻緊球員企過o既地下囉 @@

費爵爺同其他球員都經常會坐係呢度架

好like呢張相 ^^

估唔到好快就完成個Stadium Tour
個人認為比阿仙奴果個短，同埋冇咁多地方睇
但...有機會黎到，已經好開心啦
之後就去museum再影過

(續)

害喜?!?!?

大家都知懷孕初期
好多孕婦都會出現害喜o既情況
例如....作嘔作悶、嘔吐、頭暈、容易攰、無胃口....等等
我初期都有出現頭暈情況，自從媽咪煲左d紅棗水比我飲之後
情況改善左好多
成日眼訓咪訓多d囉，覺得自己好似一隻豬...
但作嘔作悶，甚至嘔吐真係少之又少
無胃口直情未試過
當然有時見到某d太過油膩o既食物都會唔想食啦
所以有d人初期懷孕又唔想同人講住
大多會避免同人外出食飯
但...我就冇呢個問題出現
所以我都算係一個比較幸運o既大肚婆啦

9月JM婚後第一聚會 @ 30/10

嘩...追blog真係好辛苦
其實呢輪忙緊其他野，所以連遊記同婚禮後記都停左
哈哈...終於打到呢篇啦
去完honeymoon返黎第一件事
就係搞gathering ^^
一眾9月JM辛苦完成世紀大project後
終於可以大解放
秋風起，最好當然係BBQ啦
今日約到9位新任C9同埋一位12月待嫁姑娘出席
一齊嘈爆小欖燒烤場

結婚前大家主要話題係籌碼工作
結婚後話題就圍繞返婚禮趣事、鎖碎事同埋勞氣事
當然唔少得新婚生活同埋婆媳關係啦
HAHA....感覺好似由ESD轉左過去Baby Kingdom呀
大家亦都分享左好多經驗比即將成為人妻o既Gloria
在此預祝Gloria o既婚禮順利完成
好啦....睇下靚相先

大家睇下我地....簡直係放肆呀

大家圍埋一齊傾計係最開心架

一早唔記得影大合照
小西同智慧都走左添
睇下我地，個個都係度"晒" 幸福婚戒呀
(左起) Circle, Jessica, Bonnie, Jenny, Sharon, Carmen, Carrie

哈哈...呢張係7星伴月 XDDD

仲有我同Gloria o既靚靚合照 ^^