搜尋此網誌

2012年4月29日 星期日

大小魔怪遊 - Day 4 &5 @ 台北

一直好有計劃的我,因為兩日雨令到我所有行程亂晒
原本計劃第四日上陽明山影花,之後行街
但一出酒店就開始落雨了
比著係以前我地只係兩個人,我諗都唔諗會繼續行程呀
但依家係三人行,唔想朗朗比雨淋到
所以被迫取消
況且下雨天,影出黎的相就唔靚
去十份又係一樣影唔到相同埋麻煩
但果一刻真係諗唔到去邊度好
之後係捷運地下街行左一陣就決定去kitty cafe食晏啦
朗朗: 唔開心,冇得玩




又一次錯晒,原來......唔訂座係冇得入座架
唉!!!!!!!!!!! 只好影幾張相就走
但真係好唔開心,一個有計劃的人突然之間計劃中的事全部實行唔到
之後,都係朗朗令我開心返  ^^
食lunch時又係度撩女仔,之後叫佢鍚返媽媽佢又聽
咁我地又開開心心去行街啦

先去Banana Taipei幫朋友買袋
原來佢地間舖都幾繞腳,又要冒住雨去,我就揹實朗朗一支箭咁跑去
最後總共掃左五個,又去左買手信啦
之後因為拎住太多野唔方便我地就先返酒店
順便比佢兩父子休息下叉下電

之後就出發去西門町
西門町,到依家都冇乜變
黎黎去去都係得果d野食,行下誠品買小說

不過今次去左一間老字號的咖啡店嘆咖啡
之前我少少都唔飲架,依家因為老闆成日請我飲
飲慣左,所以可以陪老公一齊品嚐



 呢晚的酒店房有按摩缸,岩晒我地一日舟車勞動完嘆下
未沖涼前同朗朗b玩下先
最後一日,由於我地搭下午3點15分機
所以食完早餐係出面逛下就決定搭車去機場
本來想跟旅遊書教去搵旅遊巴搭去機場
但問黎問去都搵唔到.............算...放棄啦
決定搭高鐵,快

去到機場,我死都要去kitty候機室影下相先走

五日行程咁就過左去了
好多人問我,帶住一個十個月大的bb去旅行辛唔辛苦
我可以好肯定咁答大家,辛苦到想死
但....絕對值得,朗朗可能未必有記憶
但我就永遠記得,仲有同朗朗影的相可以經常回味
期待下一次Family Trip

2012年4月24日 星期二

大小魔怪遊記 - Day 3 @ 北投、淡水、永康街

呢日最重要就係去酒店溫泉浸下啦
好彩有個親子池,加上之前果晚係房裡面都浸左一次
如果唔係就嘥左我專登訂呢間酒店的意義啦
一早起身食返個早餐先
朗朗訓醒果樣真係好鬼搞笑
 

我一早就為呢個可愛B準備變身啦
超人媽媽的囝囝,當然係超人BB啦

 
 

浸完之後就返上房執野準備去第二度參觀啦
我揀左近近地的淡水
其實我第三次黎台北,真係第一次去咋
朗朗玩夠當然訓啦,咁我同老公又可以安靜咁睇野同掃街

濕水雞BB訓到好淋~~叫都唔醒


 

哈哈.....係咁訓,終於訓左兩個鐘後醒左
唔知係咪因為台灣假期呢
淡水都有不少當地人係度參觀遊覽
黎到淡水少不免要買亞婆鐵蛋
另外買左鳥結糖等等小食
時間差唔多就回程返酒店拎返寄存的行李再去呢晚的酒店進發


朗朗: 媽媽,我地又去邊度呀?!?!?!

因為復活節假期,之前又唔記得早少少訂
原先想訂的都滿晒
最後揀左改建的丹迪酒店 (天津店)
其實外觀同埋房間都唔錯呀,簡約......
執一執行裝又再出動
今次去永康街掃街~~~~~~~~~~~~~

先搭捷運去到旅遊書教的車站落車,再依指示去行


本書講行約8分鐘就到,但我地行左15分鐘都唔多覺有類似的地方
見唔對路再問下人,先發現本書左右寫錯了
我地行左反方向,激死
而且就算冇行錯都唔只8分鐘,早知一出捷運就打的啦

去到咩都試一餐
 
 

食飽真係好滿足呀
之後當然唔會咁蠢又行返捷運站啦
見到的士就上車,去到捷運都只係NT80
早知就唔洗我一早行到傻
因為第二日要轉房,所以返到酒店又要執下行李啦

2012年4月21日 星期六

大小魔怪遊 - Day 2 @ 台北 - 北投 & 士林夜市

完全無諗過淨係影One Piece都用左我大半日
差唔多到預定時間就準備出村啦
由九族搭旅遊車返台中高鐵站,三個都攰到大覺訓呀
由台中返台北車程比由桃園過黎耐,車費好貴呀!!!!
不過無辦法啦,帶住朗朗,我一定要用舒適同快捷的方法
朗朗係高鐵上又掛住玩,唔洗訓 = =

 

捷運去新北投站中~

 


放低d野又再出動,去最近的夜市- 士林夜市
又笑又喊的小朋友


 

哈哈...係淘寶幫襯過好多次的商店
果然係台灣有門市架,仲以為佢吹水添
真係唔明,點解去親台北必吃豪大大...haha

     
 

朗朗訓左,我地可以慢慢拍拖行夜市
盡情食食食!!!!



   









2012年4月19日 星期四

大小魔怪遊 - Day 2 @ 日月潭 / 九旅文代村 - 海賊王樂園 (1)

3 Apr 2012
Day 2 - 日月潭 > 九旅文代村 - 海賊王樂園 > 台北北投


第二日就到期待的一日
一早起身搞掂晒朗朗後就去食早餐
食完就去買定車飛排隊等車入九族文化村
由於玩完後直接返台北,所以我地要拎晒所有行裝出發

黎到台灣,朗朗真係無時停架,又周圍撩人同佢玩
好多台灣人都叫朗朗做 --- 小可愛 XDDDDDDDDDDDDDDD
我就覺得佢係小魔鬼啦

話咁快就去到,經過花園再上去終於到達九族
第一件事就係去詢問處拎地圖
之後入去不停做的事就係........影相
其實都幾多地方有擺放One Piece的野
亦係度見到不少香港人,相信佢地都係慕名而來的



去到必睇的一定係3D劇場
真係好好睇呀,朗朗就係我地睇戲時訓左一覺,叻仔....識得爭取時間
lunch我地去左山治餐廳度食野,食左個草帽包飯同埋雞脾
朗朗就食我為佢準備的baby food
食完後繼續向偉大的前進號同烈陽號進發
仲有去到分別前的場景,又點可以唔擺招牌pose影相呀
仲有好多好多唔同的Figure,真係好正呀














估唔到九族真係幾大,我地由早上10,玩到下午3點左右
先淨係睇晒One Piece的地方咋
其他地方都冇去到參觀就要走啦
今次真係有少少後悔唔係日月潭住多晚,見識多d
不過放心啦,我等朗朗大d,一定會再帶佢去台中玩的
之後就起程出返去台中高鐵站搭車返台北啦