結婚4週年

人大左，時間硬係過得特別快咁
拍拖4年，結婚4年
咁就同老公相處左8年
不過我覺得我兩個咁多年都無乜變到
一直都咁"憎"大家 XDDDDDDDDDDDDD

每年紀念日，老公都叫我自己決定去邊度慶祝
每次我都會有幾個選擇，再作最後決定
每年Amigo都會係其中一個選擇
但估唔到要到結婚4週年，我先揀中佢 :p

早兩星期訂位，同時通知餐廳我地係黎慶祝週年紀念的
對方就話會安排送我地一個蛋糕
由於正日要湊朗朗
二人世界嘅約會要提前一日
放工同老公係銅鑼灣行過去
半個鐘唔洗就到

Fine Dining同一般餐廳嘅分別係
環境一定優雅
而且食一個 4 Courses Dinner都可以用我兩個鐘時間 ^^
當然啦，要慢慢享受下個氣氛架嘛

 

餐廳送上蛋糕時，安排Live Band黎唱歌
之後又幫我地影左張即影即有相
我覺得呢個安排做得好好
Live Band唱歌又好聽，我點左"I'm Yours"
我因為聽得太投入，所以都無錄低佢地嘅表演
我真係好鐘意呢首歌架
除左結婚當晚有用之外，我換咁多次電話
呢首歌仍然儲存係我嘅播放清單上

即刻同大家再分享下呢首歌先得 XD

食完飯後
再由餐廳行返出去銅鑼灣搭車
行出去雖然只需半小時
但我倆仲有一生咁長嘅路要行 
一定要繼續好好對待大家呀~~

後話....
返到家，朗朗見到支玫瑰
我話因為爸媽去慶祝結婚週年，爸爸送比媽媽架
朗朗扁扁咀問：點解唔送比我?
小朋友，你真係可愛架啫!!!!!!!!!!!!!

迪士尼光影匯預演 @18/9

早前收到迪士尼通知

會員可以抽籤出席9月18日嘅預演活動

無乜抽獎運嘅我，又抽唔到啦

本來好失望

點知尋日見朋友有一個pass多出

立即問下有冇得一齊去玩啦

就令我有機會提早體驗迪士尼最新嘅夜光巡遊

原來我都有少少運，就係有好好嘅朋友 

迪士尼光影匯詳情：http://park.hongkongdisneyland.com/hkdl/html/DisneyWholeNewLight/zh_HK/

收工立即刻飛返屋企接朗朗

好彩青衣入迪士尼車程好快

唔夠8點我就到達樂園

入場就同朗朗慢慢行入去『明日世界』果邊等朋友會合我地

再去指定餐廳食晚餐 (朗朗每次黎都一定要幫襯太空餐廳嘅薯條 @@)

食完就玩左幾個遊戲已經9點20分了

同埋朋友行出去『美國小鎮大街』搵靚位等睇巡遊

係巡遊開始前，見到迪士尼嘅職員推住車仔賣《米奇光影畫筆》

呢支筆好奇妙架，係巡遊期間

可以用透過呢支筆，改變特定表演人員服飾嘅顏色架

不過我尋晚無買到呀

搭正巡遊時間

開始隱約聽到音樂慢慢傳過來

朗朗立即同我講：『媽媽，我好緊張呀！』

其實我都好興奮 XD

以下我係尋晚影到嘅相片

用相機仔影，質素一般咋 ^^ 

 

整個夜間巡遊

真係好精彩，睇到迪士尼好落本去製作

朗朗見到Mack 同埋 Lighting McQueen時

起初好興奮，然後直情望到呆左

見到都好笑

除左《米奇光影畫筆》，另外仲有其他配合活動嘅產品

大家鐘意就記得入場選購啦~~

『迪士尼光影匯』將於10月1日正式每晚公開上演

而『黑色世界』亦會於10月2日正式開始

大家快啲約埋朋友一齊去玩啦

Blogspot：http://pandacarmen.blogspot.com/2014/09/189.html
WeShare：http://www.weshare.hk/pandacarmen/articles/4502746
She Blog：http://blog.she.com/pandarcarmen/2014/09/19/116/

中山溫泉兩日一夜遊

8月中，朋友搞左個2日1夜中山遊嘅包團
我見係朋友自己包團，行程全部食同玩
唔洗跟普通團去行街買野
又可以同埋朋友仔一齊玩
所以我都全家總動員參加

我地入住中山溫泉賓館嘅親水園房間
房間大樓旁邊就係佢地嘅溫泉園
果度有一個大型泳池同48個不同嘅生態溫泉
睇過朋友分享嘅相片
已經覺得唔錯

第一日一早到達集合地點就上車
搭左兩個鐘多啲就到達餐廳食晏
朗朗竟然呢刻先黎同我訓覺 @@

食飽就去摘龍眼
去到龍眼園終於整醒朗朗
估唔到佢咁鐘意呢一項活動
自己行來行去，仲唔洗我地扶添
我地即場摘嘅龍眼黎食
有d好大粒、好甜
不過夏天加烈日當空摘龍眼
真係熱到癲

 

玩完就拉大隊去溫泉酒店啦
入到房間，同睇相片嘅感覺一樣
而且算整潔
我地房間望出去，就見到泳池同溫泉啦
唔錯唔錯

立即換衫出去玩
每間房間都包兩個成人無限次使用溫泉區
而1.1米以下之小童亦沒有收費
入到去，放好野就玩
有貴重物件就可以放去更衣室的locker
更衣室都好清潔，就算連埋浴淋間及洗手間
都無任何異味
小朋友們最愛去波波池度玩
因為個池有好多玩意，岩晒佢地
玩左好耐先肯去游下水

夜晚出去晚餐
朗朗再次打敗睡魔 @@
我地唯有買定杯麵比佢返酒店食

 返到酒店等朗朗食飽休息一陣
又走落去玩
今次我就去不同嘅溫泉浸下
不過由於天氣熱，每個池我都係待5分鐘左右咋
之後又係陪太子玩耍 XD

第二日就簡單得多
先去食個早餐，休息一陣由爺爺嫲嫲同婆婆帶佢地去游水
夠鐘就出去食晏
我個寶貝仔，又一次係食正餐嘅時候搵周公 >0<
有理由相信佢係罷食

呢餐係我最愛嘅一餐 - 『金獎脆肉鯇火鍋宴』
果度嘅脆肉鯇比我地平時係香港食到嘅美味
無泥味，夠脆口
但就唔係太岩我老公啦 XDDDDDDDDD
希望黎緊再有機會同朋友一齊去玩啦~ 

Blogspot：http://www.pandacarmen.blogspot.hk/2014/09/blog-post_17.html
WeShare：http://www.weshare.hk/pandacarmen/articles/4502540
She Blog：http://blog.she.com/pandarcarmen/2014/09/18/zhongshantrip/

產品試飲 – New Bendar Health Fit PRO 諾貝德健體素

對於產後尚未修身成功嘅我

聽到PR邀請試用美容及纖體產品，簡直係無需要考慮

立即應承！！

今次試飲嘅諾貝德健體素，係乳清蛋白粉沖劑

由德國原裝生產，通過政府之健康認證

不含任何激素及藥物

產品中嘅乳清粉源自高山牧場的牛奶中提取

產品含有左旋肉鹼（L-Carnitine）& 乳清蛋白 (white protein)配方

乳清蛋白加左旋肉鹼呢個組合，能夠有效咁促進腸道蠕動

加速人體脂肪氧化分解

而左旋肉鹼更加可以促使脂肪轉化為能量，增加肌肉密度，減磅，瘦身

成份更包括多種營養素、維他命、礦物元素及氨基酸等

可以增強免疫力、抗衰老、淡化暗瘡、色斑、口臭、令皮膚變得光澤

咁多好處，真係好期待

沖飲方法：

將一袋(30g)健體素倒入400ml水杯內，以300ml溫開水 (約37ºC以下)沖調

攪勻就可以直接飲用

一罐健體素共有14包

佢地建議每日飲2杯

即一罐已足夠1星期嘅份量

可選擇早、午、晚餐前一個鐘飲用

我就揀左每日早同晚餐前飲

沖調後嘅健體素有好香嘅雲呢拿味

唔甜，容易入口

頭兩日飲，飲用後有飽肚嘅感覺

一個鐘頭後進餐

食完後開始感到個肚“嘰呢咕嚕”

同埋肚脹脹咁

返到屋企都去左一次便便

第三日開始，可能開始習慣啦

所以無左食飽就想去洗手間嘅感覺

食量的確比之前減少左

飲用一星期後，明顯肚腩扁左少少

但體重就只係輕輕的跌左0.5kg

當然啦，我只係飲左一星期之嘛

一般黎講，以4星期為一個週期

飲用1-2個週期先開始見到明顯嘅效果

一日兩杯健體素就可以有美顏同瘦身嘅功效

大家又點可以錯過

依家，可以係指定嘅屈臣氏買到諾貝德健體素

網站：http://www.newbendar.com.hk/default.asp

銷售點：http://www.newbendar.com.hk/inf/22220/%E9%8A%B7%E5%94%AE%E5%9C%B0%E9%BB%9E?selectedid=3

Blogspot：http://pandacarmen.blogspot.hk/2014/09/new-bendar-health-fit-pro.html
WeShare：http://www.weshare.hk/pandacarmen/articles/4502100
She Blog：http://blog.she.com/pandarcarmen/2014/09/15/new-bendar-health-fit-pro/

產品試用 – 《位元堂》出品的『小兒清熱散』

今次試用產品係《位元堂》出品的『小兒清熱散』
《位元堂》育嬰系列有很多種類的產品
而『小兒清熱散』我係第一次比朗朗飲用的
『小兒清熱散』含牛黃、水牛角、太子參等三大珍貴中藥
有助清熱解毒，紓緩喉嚨痛、口瘡、口氣大、眼垢多、小便帶黃、大便不暢等熱氣徵狀，配合其他中藥材，無添加劑，全方位針對小兒熱氣

朗朗係一位唔鐘意飲湯水同涼茶之類的小朋友
雖然暫時未有眼垢多、大便不暢等情況，但訓醒後總係有陣口氣
之前用盡方法都氹唔到佢飲其他清熱飲品
直至有一次佢太熱氣，咬到自己條脷後
我再次解釋因為佢間中食熱氣的食物如薯條等，耐而耐久就會咁
為左唔想自己辛苦，朗朗開始接受我比清熱飲品
每次比朗朗飲用/食用新野
我都會自己試一啖，希望知道係咩味道
會唔會太難飲/食而令佢抗拒
用溫水將沖劑沖好
『小兒清熱散』是啡色的
但飲落其實無乜味，只有淡淡的藥材味

拎去比朗朗飲
超初佢見到係一杯啡色的飲品已經扁起咀
但我再同佢講媽媽已試飲
加上唔飲下次又會有機會咬親自己
所以佢立即硬住頭皮飲第一啖
飲一啖後佢就好快"咕嚕咕嚕"飲埋其他

對於平時放工返到家已經好晏O既工作媽媽
最方便都係使用沖劑
產品建議每日飲一至兩次
但我就間日比佢飲
希望慢慢能改善佢有口氣呢個問題
岩岩仲係報紙見到位元堂做緊優惠添
位元堂小兒清熱散$78 (原價$138)
由即日起至18/9到香港位元堂門市及屈臣氏買位元堂育嬰產品即可以$78換購位元堂小兒清熱散乙盒

售價：HK$138
銷售地點：位元堂門市、屈臣氐及特約藥房
faceBook：http://www.facebook.com/wytno1baby
查詢：2727 8911

Blogspot：http://www.pandacarmen.blogspot.hk/2014/09/blog-post_12.html
WeShare：http://www.weshare.hk/pandacarmen/articles/4502062
She Blog：http://blog.she.com/pandarcarmen/2014/09/07/waiyuentong/

開學日闖入迪士尼

朗朗今年直升原校K1班
因此開學前無需要上適應班
今年學校9月2日先正式開學
我就襯呢個機會，係大部份人嘅開學日
帶朗朗入迪士尼玩返日，務求玩到盡

大約12點都踩入場
嘩~好耐無試過咁少人啦
天氣依然好熱
我同朗朗先逛下商店嘆冷氣
就去成年無玩過嘅《馳車天地》
無辦法啦，次次都話要排一個鐘或以上
每次都無能為力呀
今次排10分鐘左右就有得玩啦

之後玩左好幾個遊戲，有啲直情唔洗排隊，就咁行入去就玩得
朗朗就緊係開心啦
三點多，會合埋朋友仔後
先睇巡遊
再三個一齊玩
玩到夜晚7點先走

仲有，今次係朗朗第二次同職員哥哥姐姐交換襟章
佢好叻，入場之前已經諗定要換走邊個
一見到鐘意就有禮貌地同職員要求交換
朗朗揀親都係一啲比較大嘅襟章
等我下次同大家分享下佢嘅戰利品 

我同奕朗講，玩埋今日就要開學啦
佢好似一個小大人咁，同我講：係呀，聽日返學啦
所以乖仔，不枉我帶佢黎玩
下次再去，應該會係十月嘅事啦~~
因為十月會有黑色世界玩，而且更有最新的「迪士尼光影匯」夜間巡遊
岩岩今日 (9月11日)係預演日
大家可以去迪士尼官方Facebook專頁
留意最新動態啦
睇完D相，真係令到我超期待
因為有朗朗最愛的《Cars》

(以下相片轉載自香港迪士尼樂園Facebook專頁) 

咪唔記得仲有好多迪士尼黑色世界嘅活動！ Check out some of our "Disney Haunted Halloween" offerings too! (Photo by CM Jacky, Doris and Winnie by 香港迪士尼樂園 | Hong Kong Disneyland.

Blogspot：http://pandacarmen.blogspot.hk/2014/09/blog-post.html
WeShare：http://www.weshare.hk/pandacarmen/articles/4502098
She Blog：http://blog.she.com/pandarcarmen/2014/09/15/104/