我的18小時產程

新手媽媽真係忙到不得了
分享下我誕下小Edwin o既過程

5月28日凌晨5點左右，訓訓下感覺到有少少水漏出黎，以為要去廁所啦，去洗手間後覺得唔似小便，諗住再睇多陣。之後眼光光係度等，約六點又到去廁所，發現除左水仲有少少粉紅，立即話比老公知，同佢講我要沖涼準備入院啦，我仲見冇陣痛鬼咁滋悠....最後八點幾去到產房，好快確認穿左水就正式上產床，老公幫我搞掂所有入院手續後就返屋企等候。

但由於我穿左水但未開始陣痛，醫生話最好催生，唔係bb好易受到感染，所以我都立即決定催生，同時佢地已經提我，催生過程會好長好痛，不繼叫我考慮無痛分娩....
我一直都唔想用無痛，所以最初只選擇聞氣，10點正式落藥，由2度藥開始，果時大約5-10分鐘痛一次，細痛唔長，我就一直唔聞氣，姑娘就成日提我痛就聞唔好忍，到第一段探病時間，老公黎睇我，我果時仲算忍到下痛，但因為我個子宮仲未有動靜，落藥度數加到8度，keep住約3分鐘痛一次，每次痛過30秒

老公不繼咁講笑話引我笑，分散我注意，果時都仲識笑，我再問姑娘進展，佢話我係痛好左但都未有任何進展，1度都冇......老公走左後再加藥，去到16度，開始約1分鐘痛一次...醫生同姑娘再建議我用無痛，我最後揀左打止痛針，打針後4個鐘後bb出世，bb要打解針，因評估過我有排先生得，所以打第一支，打完真係痛少好多，仲可以恰返陣，由於我催生都生唔到最後有機會開刀，因此一定要禁飲食，個人真係好攰

到老公再黎睇我時，止痛無效了，子宮只係薄左仲未開，落藥keep住16度，醫生再評估，打第二支止痛，果時繼續1分鐘痛一次.....但呢支針已經無乜用，約夜晚8點落藥加到32度，半分鐘大痛一次，再問醫生都話冇乜進展，我已經痛到就黎崩潰，因為都未開夠3度，仲可以用無痛，最後決定用，打無痛果時我唔覺得痛，因為大痛真係好密好利害，反而打無痛後突然有進展，9點左右去到6度，姑娘幫我call老公黎陪產，唔知係咪突然進展得咁快，無痛對我黎講一點作用都無.....

10點幾開始感覺到有野想衝出黎咁，我問姑娘係咪生得，佢係咁話等埋你老公先啦....我個心係咁叫...老公你快D黎啦，老公黎到準備好後我再問姑娘我係咪可以生，但都未得...等到大約10點50分正式生，推左幾下，搭正十一11點bb就出世了，簡直係大解脫..

姑娘不繼話我算叻，忍左咁耐先用無痛，但我一直以為自己可以忍得到，但無諗過催生係咁辛苦，人地正常半分鐘痛一次就黎生得，我都仲要等多3個鐘先有進展....不過幾痛幾辛苦都好，生完Edwin出黎聽到佢喊，真係由心笑出黎，之後姑娘問我抱唔抱亞仔，我當然話好啦，老公仲話我淨係掛住個仔，自己都未搞掂

本來姑娘話等我聯針後幫我地影全家幅，但因為我穿18個鐘之後Edwin先出世，醫生怕佢受感染，所以要立即入特別兒童病房觀察，咁就錯過左我地第一張全家幅啦，聯針後係度等上病房都等左好耐，老公又陪左仔仔上病房，搞到差唔多凌晨1點先可以上產後病房，上到病想食少少野啦，但我諗藥效未過，有d想嘔...所以最後都係選擇訓覺。

瑪嘉烈婦產科產前講座 - 第三堂

之前個一堂冇時間去上
但呢堂一定唔可以錯過
因為課題係“認識分娩、生產過程”
預左會見到血淋淋場面架o勒
呢日早上照完結構，Jerry就返新屋等師傅黎駁電視
之後就等埋我一齊去瑪嘉烈
行程豐富
唔知係咪課題比較切身
呢日有好多準baba同mama出席
登記條龍排到好長
入到去岩岩好開始
呢堂首先講一d生育上可能出現o既嚴重問題
對孕婦同bb o既影響...等等
大約8點半左右開始問問題
我見陸續有人離開
就以為已經完成呢堂
加上好想快d返屋企執埋d野方便Jerry第二日搬
所以我都決定走
點知返到屋企睇返facebook 6月有幾個mama都有出席
原來戲肉係答問環節後 = ="
我同返老公講，佢話真係錯過左
佢笑笑口咁講，如果睇完佢淆底o既話佢可能唔陪我入產房
我話你都傻架...冇人叫你走去果邊睇架嘛
係床頭陪住我已經好足夠
我只係要佢捉住我隻手，支持我 ^^

miss左都冇計啦，唯有睇下下一次再講我地抽唔抽到時間去聽

1月23日 (20w2d) - 近照

星期六Jerry已經差唔多將所以野搬晒過新家
但因為我地搬屋呢晚都係返左沙田過夜
所以淨返o既雜物就要呢日車埋過去
臨出門口前諗起好似好耐冇影過大肚近照喎
所以叫Jerry幫我影返張相先

唔知係咪著左兩件厚衫呢
呢張相影到我好似好大個肚咁 XDDDD

之後我自拍多張比對一下
好似細dddddddddddd

20W2D o既我，肚圍已經去到33.5"了
我諗都屬於中等size卦
黎到20週，時間開始越來越快咁
我仲開始感覺到小B踢我啦
而且次數亦不斷增加
小B通常夜晚會活躍d，試過大力撐我撐到我醒左
但我仲未望到個肚彈下彈下
或者未見到波浪呀
小B....媽媽想快D見到你周圍遊呀 XDD

1月21日 (20w) - 結構性超聲波

對上一次見小B已經係差唔多一個月前o既事
好掛住佢呀
等等等...終於等到足20週去照結構啦
依家好多公立醫院都會為所有孕婦安排照結構
但瑪嘉烈o既quota好早之前已經full左
所以我唯有叫我個私家醫生介紹我出去照
本來得我一個去照架咋，後來Jerry請左假陪埋我去
一早去到尖沙咀，當然食返個豐富早餐先啦
之後照原定時間去到診所
診所裡面已經有好多人等候
坐坐下唔知係咪焗得滯，定係之前食得飽得滯
我竟然頭暈 + 作嘔...好辛苦
最後要入去洗手間嘔左2次先冇咁辛苦咋

足足等左1個鐘先到我入去
傾左2句就開始照超聲波啦
其實照結構都係用2D 去照架
但照到中途醫生swift左去3D 比我地睇
等我地睇得更清楚
小B好乖呀，全程都好合作
而且仲好叻添，一切都正常同健康
我同Jerry都好開心
wahahahaha...到重頭戲啦...醫生問我地知道性別未
問我地想唔想知，我答得好快........."想)))))"
呵呵....比Jerry恨到啦....竟然同我估計 & 夢見o既一樣
我都係叻叻媽咪
之後醫生就比返d 報告同埋相我拎走
都影左唔少相架，仲有隻過程dvd添

大家睇下有幾多野

我依家得閒就拎出黎睇完又睇
Jerry話我short short地喎
但我真係覺得小B可愛到不得了
百看不厭呀
小B你就繼續努力吸收營養啦同媽媽攤分下D重量先得架