12月28日 (16w3d)

今日係Jerry第一次陪我去診所覆診
專登約下午5點呢d差唔多放工o既時候
唔洗咁嘥我時間嘛
叫Jerry幫我登記先，唔洗我去到再等一大餐嘛
等候期間出現左一個小插曲
坐係Jerry隔離果位準媽媽
放左堆麥記係度慢慢食
Jerry坐坐下突然彈起身...大叫....頂
我咪睇下咩事囉
原來果位女士放係櫈上果杯熱朱古力倒瀉左
搞到Jerry一褲都係....佢果日仲著左件白色褸
件褸係日本買架，香港都買唔到
咁Jerry都係呻左一句: 嘩，洗唔洗得甩架
果位女士竟然好寸咁講句: 咁你想點呀
嘩...有冇搞錯，對唔住又唔講聲，又冇幫過手，紙巾都無遞過一張過黎
都算o勒，但唔係講句咁o既野囉
激死!!!!!!!! 係人地地方倒瀉野又唔通知姑娘黎抹喎
都係我去叫人抹咋，搞到人地周圍都係朱古力
如果唔係o係診所，見佢都係大肚婆，真係想鬧佢
算，唔同呢d人一般見識
見小B最重要

無耐有得見醫生啦
同醫生講返OSCAR個result，醫生都讚好
之後就去照超聲波 (最開心o既時刻呀)
haha.....Jerry好留心咁聽醫生講解
小B大個左好多，已經有9.9cm長 (無計腳仔)
醫生不停咁周圍照
我見到小B o既手仔同腳仔，手指腳指都齊全啦
又好清楚咁見到小B o既脊骨同鎖骨
然後醫生正想睇睇小B性別
我立即stop佢，話佢知未想知道住
照完後就傾多兩句，約埋照結構o既日子就走lu
今次醫生開埋多種維他命比我食
小B你就乖乖地吸引多D啦
haha...出左醫生房，Jerry突然話又好想知小B性別
我話不如入返去問囉
佢話醫生咁講應該睇得出啦，搞到佢心思思
呵呵，我下次照結構就會問醫生
但都唔會透露比佢聽呀，邊個叫佢一開始話想出世先揭曉喎
佢話會吼住我，睇下我買D咩比小B
到時都會知....hahaha....睇黎佢真係忍唔到啦

比大家睇下小B最新o既相啦

黎緊8星期要食o既維他命, 鈣片同埋葉酸

生日迪迪尼遊

幾年生日都去左海洋公園玩
今年決定去迪士尼影相
老公當然冇say no啦.......^^
我好鐘意薑餅人架，之前係forum見到d人話薑餅人會係早上出現
本來都plan左早少少入去同薑餅人影相
但遇左寒流襲港
根本連我自己都唔多願意起身
所以入到迪士尼已經係中午啦

入到去岩岩開始巡遊
都見到薑餅人...但同唔到佢影相 :p

今年先有o既Duffy

薑餅人村

次次都有同巴斯光年影相
佢仲同我跳左part舞 XDDDDDDDDDD

普通版米奇

每次都好想遇到史迪仔
但無奈每次都遇佢唔到
只好同公仔影相

日光下的聖誕樹

本來排隊果時係等緊Donald同埋Daisy架
唔知點解排排下變左松鼠...嗚..比返Donald同Daisy我

廚櫃內好多薑餅人裝飾

第一次係迪士尼玩旋風木馬

夜晚o既聖誕樹

又入去商店內肆意影相

Duffy太貴啦，我唔捨得買
同佢影張相算了

因為星期五係夜晚9點先放煙花
唔想等到咁晏 (因為之前都睇過2次)
所以8點左右就出返去食晚飯lu

12月25日 (16w) - 聖誕節

Merry Xmas to all of my friend

踏入第十六週啦
仲係普天同慶o既聖誕節添
以前我同Jerry都鐘意約埋一班朋友到酒吧玩
今年要收心養性o既我
就同Jerry一齊去朋友家BBQ
都玩得好開心
早兩日去左瑪嘉烈做第一次產檢
我o既血壓...體重...其他等等都一切正常
入到醫生房聽小B心跳亦都冇大問題
因此醫生認為唔需要照超聲波
所以冇機會見小B一面添
不過不失為一個好事
因為小B健康先唔需要探入檢查o者
仲有上次做左OSCAR test
雖然知道醫院冇call我即係冇問題
但我都伺機問下醫生個比率有係幾多
聽到個result真係放下千萬個心
係1:8xxx.........
太好啦.....小B, 你要加油呀
記得吸收多D營養
爸爸下個week就會陪媽媽去睇私家
到時會睇下你有幾叻豬 ^^

讚讚讚讚讚

我同老公婚後第一個生日，都係非常特別
因為有小B陪住我地一齊過

咁多年生日我都冇期望過老公會特別買咩送比我架
原因係有一次行街佢揀o既野比我彈過
然後我又衰衰咁話佢冇乜taste....最有taste係揀左我啦 XDDDDDDDD
所以由果時開始佢通常先打探我想要咩
又或者帶埋我一齊去揀
甚至乎係叫我自己買完問佢claim錢
所以今年我都冇諗過佢有咩送比我

因為18號要去飲，係銅鑼灣走果時都11點幾
一踏正十二點，收到老公個sms同我講生日快樂
已經好sweet
返到去佢無啦啦叫我係佢個袋拎個紙袋比佢
我都未察覺到會有驚喜

*0* 原來係我份生日禮物
開心到震，因為我今年叫老公帶我去迪士尼玩
我已經當係禮物黎架o勒
問準老公後立即拆禮物
嘩....岩心水到暈呀

呢對耳環o既款式，完全係我平時最愛戴o既款式
老公萬歲 *\^O^/*
所以真係不得不寫返篇blog黎讚下佢
我今次比滿分呀.............

Blogger Manchi o既觀禮卡之內有乾坤

我請左老公幫我做攝影
XDDDDDDDDDDDDDDDDDD

Manchi同佢bf真係好有心思同心機
佢地足足用左3個月時間去整呢批卡架
我都有幸可以得到佢o既邀請，真係好開心
我會好好咁珍藏佢架 ^^

Blogger Manchi o既觀禮卡

參加Mrs Chik Chik o既註冊儀式
見到好耐冇見o既Blogger們
Manchi仲帶左佢同準老公悉心製作o既觀禮卡出黎
派比我地，邀請我地出席佢地o既註冊典禮
未打開已經覺得好靚啦

內頁

由於內有乾坤，所以我拍左段video
hahaha...由於連我自己都覺得自己有少少低b
所以段片會係下一篇出 (私友化)

(Mrs Chik Chik) Vivian & Alan's Wedding Ceremony @ Dec 18

岩岩個星期六就係Mrs Chik Chik o既大日子
可惜我一早應承左朋友去佢o既晚宴
所以只能出席佢地註冊儀式
準時到達教堂
仲有少少時間比我影下reception

簽返個Blog名先 ^^

好靚o既reception呀
最愛佢d波波簽名筆

之後入返教堂等候儀式開始
教堂好大好靚呀，佈置亦好得宜

好開心見到Vivian o既爸爸精神都唔錯
帶住靚靚o既Vivian進場

然後將愛女交俾Alan

Ceremony programme都係靚到爆架

今次係我第二次係教堂觀禮
比我感覺都係一樣
較其他註冊儀式莊嚴o既
Vivian係宣誓期間已經有少少忍唔住喊啦
其實...係宣誓呢一刻真係好感動
係咪得我咁叻無喊呢?!?!?

完成儀式後就出去影相
大家睇下兄弟姊妹們都好靚好襯架
Vivian仲準備左d心形波波影相用~~pretty ^^

haha...其實我覺得Alan比所有兄弟高大，所以兄弟們想拋起佢時
Alan好似好驚咁，大家睇下
Vivian個表情都好似有少少緊張喎
驚住老公住比人拋落地下嘛?!?!?

到我地影相啦 ^^
(左) 鄭彭艾美、熊貓車、Manchi、Mrs Chik Chik、Alan、Fi、NOR

只係註冊典禮已經睇得出Vivian o既心思
每一項都近乎完美
再次祝福兩位~~百年好合、永結同心

Zoe & Samuel's Wedding @ Dec 5

每年12月都係婚嫁o既好月份
今年受邀請o既次數仲打破左以往o既紀錄
總共係6單呀....非常利害
haha...因為搞結婚而認識左好多B2B
我都好想逐一去感受佢地o既用心努力製作o既婚禮
12月5日係Zoe同佢老公Samuel o既婚禮
我約埋其他blogger一齊去踩場

入口o既Welcome Banner 好靚

Fiona 出品o既簽名筆....必屬佳品

相簿區...好多靚相呀

其實Zoe婚紗造型我地都有影架
不過我部機無
Zoe o既造型都好靚呀，尤其係迎賓呢個造型
成個Barbie 咁，好可愛呀

(左) 阿心、Wing、Zoe、Samuel、Carmen & Gigi

我仲帶埋老公一齊去踩場添
一上台Zoe立即話我地著情侶裝...haha

最後再一次希望Zoe同Samuel永達幸福快樂
快d添丁、三年抱兩
到時佢o既小B可以同我o既小B一齊玩啦

Kitty back to London @ 朗豪坊

又到追blog時間
我呢個Kitty迷又點可以錯過同Kitty影相o既機會啦
星期六o既旺角真係多人到爆
好彩商場內大部份人都算好有秩序，排隊影相
我仲帶埋上次係M記換返黎o既御林軍Kitty一齊去影相添

haha...幾襯 ^^

全部造型都好靚呀
而且d景點真係同倫敦好近似
令我諗返起honeymoon時同honey一齊過o既日子....sweet