Lady Qooza x Citysuper Cooking Class

朗朗大個左，我可以成日帶佢周圍去玩
今次得到Lady Qooza的邀請，帶朗朗去Citysuper內的Culture Club學煮西餐呀~
真係唔講唔知原來尖沙咀Citysuper內有個地方係教人煮野食架
平時都無留意到
其實果度都算係廚房，因此Lady Qooza仲安排左姐姐係隔離房間陪住朗朗
等我地開火時唔洗朗朗係附近整親

由Culture Club的行政總廚Charmaine教我地煮兩道菜
包括: 1) 芝士焗波士頓龍蝦 & 2) 蘇格蘭羊扒配芒果汁
之後再為大家示範煮焗法國蝸牛
真係好豐富呀
平時係家都會煮下西餐o既，但肯定無咁專業囉
絕對係求求其搞掂就算...haha
呢d菜式更加未試過處理啦

好啦，我地先煮好個配羊扒的芒果汁
其實我覺得煮西餐，調味料真係好重要
以下呢d都係要黎煮個汁用架，都係一d比較好材料

 

 

好快就整好個汁待用啦，之後就開始處理龍蝦啦
估唔到原來切龍蝦只要掌握得好，其實好容易
話咁易就分開左一半啦
之後放好準備左的材料後放入焗爐就可以了

然後Charmaine就為大家示範整法國蝸牛
我的手勢同佢比，真係差得遠啦，hehe
準備好食材後，大家每人負責整少少，待焗

最後就係煎羊架
一拎出黎就睇得出d羊架好靚
未煮我都流晒口水啦，我自己好鐘意食羊架
但係家從來都唔敢整，因為怕自己整得唔好食左d野
Charmaine指出我地的通病
可能大家都煮慣中餐，習慣左炒野
所以煎羊扒時大家都好鐘意將塊扒反來反去
呢d真係要戒啦
其實只要火力同埋時間配合得好，反一至兩次已經足夠
經Charmaine指導下，我煎的羊架搞掂啦
而且，龍蝦都已經焗好啦

大家當日都煮得好開心呀

呢個就係我當日的午餐
真係非常豐富，朗朗都唔執輸架
同我一齊食龍蝦...yummy

上完呢堂發現，其實望落好難搞的食材
原來都可以自己煮到架
真係好開心，下次我一定會係家整龍蝦比老公試下
臨走前當日要同好友們影下相啦
Mrs Chik Chik 同埋 Pia當日都有出席，Mrs Chik Chik仲帶埋朗朗一齊黎添

 

再一次感謝Lady Qooza同Citysuper Culture Club的邀請

另外，Citysuper Culture Club搞左個親子煮食比賽
「大『煮』人 ‧ 小廚神」廚藝比賽 Super Kids Cooking Competition 2012
有興趣可以去參加喎

自家烏冬 & 日清粉白麵包

其實部機總共有14個function
之後我手痕學人整烏冬
其實有部機係度真係超級方便呀
不過用之前買的普通中筋粉
整出黎d色好似唔夠白，不過都尚算彈牙

烏冬食譜:
鹽 2g
冷水 135g
中筋麵粉 300g

之後就將所有料放入去Kenwood 450，set mode 10 "Dough"
部機停左後就拎出黎再加手粉搓多一陣
壓平摺三摺就可以切啦
不過我冇買切麵機，又只得菜刀
所以切出黎的烏冬比較粗身
不過第一次實係咁架啦
朗朗都食晒佢碗粟米蓉烏冬架，好比面
我自己就食清湯
Yummy
熟能生巧，相信我整多幾次一定會越來越好

另外，搭朋友經人係日本訂左D日清強力粉返黎 (但因為貨源唔多，最後我拎左一包咋)
第一時間整返機白麵包黎試下係咪比其他麵粉香D先
呢機亦都係無蛋奶的白麵包
估唔到效果真係好好
除左發酵得比之前更好外
我發現第二日食都仲幾軟熟 (雖知道自家野無加任何防腐劑同其他令面包軟熟D的化學成份，一定好快變硬同變壞)

白麵包(無蛋奶)食譜:
高筋麵粉 350G
鹽 3G
糖 28G
牛油 25G
酵母 5G

慢慢開始掌握到整麵包的技巧
我會一直嘗試整唔到的麵包的

自家麵包

我不嬲都係一個好鐘意食包o既人
去到歐洲一日三餐都有包食，我就開心到暈，老公日日見到就頭痕
其實麵包機都唔係d咩新o既產品
好多年前已經成日聽同事講，佢每朝都食新鮮出爐的自家麵包
加上朗朗已經大個啦，開始食不同的固體食物
但其實，街外的食物都含有大量的化學野
食得多都冇咁健康
所以決定買返部機，做自家愛心麵包
周圍上網搵資料，問用緊不同牌子麵包機的朋友
比較後，當然覺得Panasonic的係最好
但香港無行貨，要買就要經台灣或日本訂返黎
又要加火牛，又冇保養
需要佢地壞o既機會少之又少
但....如果我就係黑仔果個，個個唔壞係壞我果部點算呀
所以最後我揀左比較大部的Kenwood BM450
哈哈，經HSBC訂比市價仲要再平幾百
都算唔錯
機未到我仲已經買定所有材料同埋用具添
包括陳枝記寶刀一把 XDDDDDDDDDDDD

起初以為只要跟住食譜，就好易做出好味的麵包
但原來唔係架
我第1、2次都跟Kenwood的食譜
做出黎樣又唔靚，又發得唔高
但好彩味道都唔錯，皮脆內軟
老公同朋友們一晚已經幫我清晒

1st & 2nd - 白麵包 (無蛋奶)

之後就請教Kenwood群組內的朋友們
終於少少事都有機會影響麵包發酵的情況
酵母掂到水 / 鹽啦、放材料的次序啦
材料的保存方法啦
原來，真係唔簡單
為左每日都可以有包食，我會繼續努力嘗試，務求整到不同口味又好食的麵包

養兒方知父母心

相信每一個人去到十幾歲的反叛時期都可能好似我咁
曾經好討厭父母
覺得佢做乜都好似睇唔順眼咁
但我都算好快過左果個時期
知道家人永遠都係為左我地好
尤其係我媽咪一直都係一個好開明的人
只要唔係過份的事，佢都好少會特別過問
我同媽咪的關係似朋友
我唔敢講自己好孝順，但我認為我應該要做的我都會去做

當自己真真正正成為一位母親
更加強烈的感受到媽咪的偉大
懷孕時種種的擔憂
生仔果種痛，爸爸就算係旁邊陪產都係感受唔到的
到bb出世後不同的問題都令我好感觸

我會用行動去表現我的感覺，因此好鐘意鍚我愛o既人
記得我都同老公講過，希望每日可以鍚佢一百啖
依家，我都想每日鍚朗朗一百啖
然後有時我就會同老公講，我諗我地細個o既時間，爸爸媽媽都係咁每日鍚我地好多好多次
朗朗病的時候，我心會痛，希望病o既係自己
朗朗曳的時候，我鬧佢打佢，我一樣心痛，更加忍唔住喊
果一刻我終於明白，點解我同妹妹細個比媽咪罰果時佢會喊啦
朗朗依家只係一歲多d，將來將會有更多更多令我憂心的事
終於深切感受到"養兒一百歲長憂99"
係就係老土d，但相信每個為人父母的都係咁諗