搜尋此網誌

2012年12月28日 星期五

Rosken Dry Skin Cream

踩入冬天,天氣雖然有時比較潮濕,但一轉天氣
皮膚就開始變得乾燥同埋痕癢
仲有呀,朗朗有BB濕疹
雖然好得8899,但都好難避免皮膚會開始變得乾身
我好怕佢d濕疹又再起呀
所以一入秋開始已經幫佢轉返用淋浴油
當然唔少得要搽cream啦
今次試用左Rosken o既 Dry Skin Cream

ROSKEN o既 Skin Repair 皮膚修護系列
專為乾燥及敏感肌膚使用,可修復受損肌膚,保護肌膚防止出現老化情況,更可令肌膚細胞更新,回復柔滑

- 為極乾燥及爆拆皮膚而設
- 含Dimethicone,在肌膚表面形成保護層並注入水分,防止水分流失,舒緩極乾燥肌膚
- 加入橄欖油精華,加強保濕並抗氧化
- 持續使用可阻止造成極乾燥皮膚的惡性皮膚循環,修復極乾燥及爆拆皮膚,使其柔滑健康
- 備有75毫升、250毫升、375毫升及500毫升


首先講講佢o既質地好似乳澈咁,無油淋淋o既感覺
而且有淡淡o既香味
搽上皮膚好快就吸收,唔會笠痴痴

搽之前好明顯睇到手上o既乾紋



搽完之後指甲邊o既乾紋立即無晒,而且仲keep到一段時間架


最好o既係佢有唔同o既size貨裝出售
依家屋企放一支500ml就全家用
我起身同臨訓前就幫朗朗同老公,當然唔少得幫自己搽啦
手袋就放一支75ml隨時用

2012年12月17日 星期一

爸爸受傷了

近期老公打籃球o既興致又再起
頻頻去練習同比賽
記得初初拍拖時,我仲廿四孝到
冬天得10度左右,星期日7點就躝起身陪佢一齊入屯門打場波
依家,無呢支歌仔唱啦
一來要湊仔,二來查實真係好on居仔架
無覺好訓之餘仲要坐係度凍
咁老公就唯有自己入屯門打波啦
唉.....咁耐唔入,一入就出意外
打場波搞到十字韌帶斷左
最終要做手術

老公總共住左8日醫院呀
呢個星期我都keep住....返工 > 醫院 > 返家湊仔
真係鐵人都暈呀
係就係攰d,但為左陪老公都要照頂
手術後,仲要用6星期拐杖行路
希望老公好好休息,快d康復啦


腫過豬蹄o既左腳!!!!!



2012年12月7日 星期五

朗朗18個月

以為睇住人地o既小朋友大時間好快過
原來睇住自己仔仔d時間都過得好快
朗朗已經足18個月大啦
依家識講好多單字 / 詞語
爸爸、媽媽、婆婆、哥哥、弟弟、姐姐、姨姨、叻叻、早晨、no way、曳曳.....etc
甚至有時突然彈一兩句句子出黎
你曳曳呀、我未玩完、做乜野呀、做乜唔等我
真係令我好驚喜

仲有,佢曳曳比爸爸罰時,真係唔敢亂郁
叫佢幫我地做野拎野佢又做得到
最鐘意幫我拖地先最搞笑...haha
朗朗已經識用普通水杯飲水啦
本來我想慢慢幫佢轉飲管杯飲奶、再轉水杯,再戒埋飲樽
但依家佢都仲係鐘意用奶樽嘆奶
無計啦,有d野又唔急得o既
慢慢來

早前Illuma送左一張繡有Edwin o既熊仔波比朗朗
收到時真係好驚喜呀
其實Illuma期中都有一d優惠 / 講座之類比用家架
大家記得留意住佢地網站不時o既更新

http://www.illuma.com.hk/web/inf/index.cfm?action=illuma.communityExclusiveOffers&s_displaylang=tc


Illuma送來的包裹


朗豬成日攬住佢黎嘆奶


2012年12月2日 星期日

1st Pre-Nursey Class Offer - 青衣康傑

對青衣康傑o既印象唔錯,in完之後都幾期望可以得到offer
結果會係面試後2星期內知道
但一星期過後,有相熟媽媽係中午話己經收到取錄通知
搞到我鬼咁緊張,好想快d放工返家開相箱
個心又囉囉髦咁
真係估唔到,自己放榜都無呢d感覺呀
返到家第一時間開信箱,果然收到信
老公話,你咁緊張一係佢拆信喎
幾大都唔制,一開心信

YEAH!!!!!!!!!!!!!!!!!
雖然唔係我首選o既上午班,但都好興奮
本來諗住後補上午班位置架
但問過照顧朗朗的婆婆,佢認為比朗朗返下午班會比較方便佢
咁就唔洗再諗啦
一於交留位費

不過康傑始終係我心水中的第三位
首選及次選分別係2013年o既1月同3月先知道結果
希望到時再有好消息
等我多個選擇啦

2012年11月30日 星期五

可憐o既朗朗b

早兩星期,朗朗比表哥惹到出水痘
估唔到水痘真係可以潛伏兩星期先發出黎
起初仲諗住表哥仔出完,過左兩星期應該無事啦

11月17日,差不多上完playgroud就喪扭計
我以為佢眼訓啦,點知一抱起發現佢有少少燒
之後抱抱下發現頭仔有幾點粒粒
望真d覺得似係水痘
咁就拿拿聲同佢離開,諗住去睇醫生
但果時已經太晏啦,好多醫生都閂左,唯有等第二日啦
第二日基本上唔洗睇已經可以肯定佢出水痘啦
但點都要睇醫生o既

出水痘要隔離,無得去街無得返學
好彩仲有表哥仔陪下
唔係真係悶死朗朗呀
原來水痘真係細個出好d
可能朗朗唔算出得多啦,又加上轉左天氣著長袖
我見佢都冇R過d水痘
而且佢只係低燒過一陣,冇食藥已經自己退埋
所以唔算出得辛苦

不過禍不單行
呢個百厭小朋友,竟然走去玩電熱水壼 "6"親腳仔..........唉
果日我放工返到去,見到佢包住隻腳仔
立即嚇一嚇,好緊張問婆婆咩事
原來佢襯婆婆行開,走左入廚房"禁"未lock好o既熱水壼
不幸中的大幸係佢唔係直接"6"到腳仔
係d熱水流向腳底"6"親
希望佢受到教訓,唔好再轉搞廚房內o既野啦

2012年11月29日 星期四

早稻田蟲草菌絲體膠囊

雖然我無鼻敏感等症狀
但間中硬係會訓得唔好,或者咳醒o既情況
早前試食左早稻田o既蟲草菌絲體膠囊
感覺都幾好

依家市面有好多唔同o既健康產品
其實有時真係唔知點揀好
我大多會選擇朋友推薦
我相信唔洗多講,好多人都知道蟲草有咩功效啦
不過依家蟲草o既價錢真係太貴啦
早稻田o既蟲草膠囊係由自然培植蟲草提煉,再加入槐花精華而成o既
成份天然,食左可以調理下身體

功效
減鼻敏。強氣管。易安眠

  1. 減輕鼻敏感症狀:加入日本大學專家臨床實證的槐花精華,強化功效
  2. 強氣管:理氣止咳、化痰,有助呼吸暢順
  3. 易安眠:寧神安睡,改善睡眠質素
  4. 補肝腎:滋陰補腎,疏肝健脾
  5. 強體質:提升免疫力,抗疲勞

食用方法好簡單
成人每日服用兩次,每次兩粒
如無鼻敏或氣管問題,只是一般保健用途,每日只需每次一粒

想了解多d,可以去 www.wasedahealth.com

2012年11月11日 星期日

Update 下近況先

近期真係好忙呀
無計啦,又要幫個囝報學校,又同佢返PG
仲有,有D學校已經開始面試啦
多多時間都唔夠我用呀

近期除左朗朗轉左食Illuma外
佢好多朋友仔都開始轉食
主要佢地試飲過Illuma送比佢地o既sample後
覺得唔錯就開始轉啦
估唔到依家身邊好多相熟媽媽都已經幫bb轉左
大家間中都會互相交流下有關轉奶後的情況
有bb改善左便秘o既情況
有bb吸收好左,肉仔都實淨左
聽到大家都有好進展同埋解決左之前o既煩惱我都好開心
因為我無介紹錯嘛,成日好怕介紹完人原來果樣野出黎效果同我講o既有分別

唔知大家有冇相同情況呢?



Illuma比較難溶少少
但經過三個月o既訓練,我已經知道沖奶秘訣啦
最快o既方法就用筷子搞 XD
另一個方法係我近期成日用o既,就係先開所需o既水份70%
再加奶粉,捽暈支奶後,再加多少少熱水至適當份量,再捽幾下
通常都會溶晒 ^^
不過朗朗自己都好叻架,唔知係咪見我開奶會捽幾下啦
有時見佢自己飲飲下拎開支奶捽幾捽
好搞笑

仲有,朗朗真係大個仔啦
每次飲完奶,佢會自己去搵返個奶樽蓋,蓋好後先遞返支奶比我
真係乖仔
其實我諗都差唔多係時候幫佢戒奶樽啦

以前成日要去藥房撲奶粉
依家就唔洗lu,最主要係因為Illuma只係指定地點出售
又或者可以打電話或上網訂
我呢d人懶人當然上網訂啦,方便快捷
最重要係,唔洗我搬呀嘛

呢個小朋友幾嘆
可以係五星級酒店o既King Size床,睇住電視
嘆佢最愛o既奶奶


2012年11月5日 星期一

朗朗的2nd Interview @ 青衣康傑

10、11、12月都有Interview
第二間Interview o既學校,係無學券o既康傑中英文幼稚園 (青衣分校)
呢間係我心水第三位的
有上一次經驗,大概知道幼稚園Interview 個流程
今次我點都要老公同行
雖然明知面試時,只可以一位入去
但搵佢黎打下氣,同埋幫我拎下野都好嘛

其實係面試前一星期
岩岩出席左佢地主辦o既簡介會
大約知道佢地o既教學概念同模式
我都幾鐘意
康傑主張活動教學、邏輯思維o既教學方法係我最buy o既
而且更著重語文能力
所以我對心目中學校o既排位都有少少改變

當然我一早調整左朗朗o既作息時間
等佢面試前訓返一覺
好等佢之後夠精神,唔好扭計
去到又係warm up時間
好多家長同小朋友已經係度等候
朗朗o既number已經排到207號啦
以我所知,上下午各一班,共收80人
而且康傑暫時只安排左11年5月或之前o既小朋友推行面試
所以即係話又係好多人爭學位
知道5月都勉強可以叫做大仔,真係有d慶幸朗朗早左兩星期出世

遇到朋友仔,打聲招呼
係度等叫名
都唔算等太耐就被叫名啦
由負責老師帶我地入到去指定課室
入到去仲有另一位小朋友IN緊
咁我同朗朗就坐好
我叫佢同老師SAY HELLO
佢就細細聲跟住講
之後老師要佢做o既野同答o既野佢都答到
令我有少少驚喜
因為有d平日係家我冇聽過佢講架
原來佢都收埋收埋...haha
整體黎講,我覺得表現唔錯
亦都令我覺得,朗朗.....你真係大個仔啦 ^^
約兩個星期後會收到取錄結果通知
又要緊張一輪啦!!!!!!!!

等待面試

2012年11月1日 星期四

朗朗 0-1 Book

送比朗朗o既文庫本終於完成啦
我每年都會整一本送比朗朗,希望佢長大後得閒可以拎返出黎回味
http://www.tintint.com/project/info/26376102e4f


2012年10月19日 星期五

年年驗身令你放心 @ 保卓體檢中心

其實踏入三字頭開始
我已經比以前更加注重健康,始終無野比健康係更加重要架
無左健康,就算再多o既子女又或者更多o既錢都無用
所以我覺得每年做一次身體檢查係必需的
要了解自己的身體狀況
經朋友介紹,去左新開業o既保卓體檢中心做全身驗查
今次仲捉埋老公一齊去添
由於佢係乙型肝炎帶箘者,所以佢就更加需要check清楚呀

約左星期六去
因為婆婆唔得閒,所以我地帶埋朗朗同行
去到油麻地美迪寧廣場先發現
原來呢個廣場全幢係醫療中心
除左體檢中心,仲有不同o既醫生駐場
成日搭車經過都無特別留意到添


入到去已經見到幾位客人等緊
登記好後我地就一齊坐係度等
等候位置幾舒適,朗朗仲落地周圍走
又去撩姑娘同佢傾計,總之就無時停啦






等左唔係好耐方醫生出黎叫我地入房簡單咁了解一下身體狀況
因為帶住朗朗,所以我地三個一齊入去
入到去,朗朗都無扭計喎
最正就係醫生一知Jerry有食煙習慣
第一時間叫佢戒 XDDDD
另外,Jerry都有話佢知近期感覺心臟位置成日拿住痛
咁佢就建議我地做埋心電圖檢查
傾完計就出返去等

Jerry做完所有檢查後就到我
成個過程大約總共20分鐘左右啦
其實都好快手
之後只要我地交埋未有o既樣本就完成晒整個檢驗
過兩日我地就交齊晒所有野等報告
報告係再過兩日已經完成,中心就打黎約我地時間返去睇報告
當晚都係方醫生為我地解釋報告
估唔到我地兩個都尚算健康,醫生建議我地做多d運動就已經足夠
咁當然要定期檢查身體啦
然後就將我地o既報告交返比我地

中心比我地o既感覺唔錯
地方整潔舒適,姑娘同醫生又好nice,亦好肯解答我地問題
效率亦幾高,所以下年我地應該都會再返黎做檢查
大家有興趣可以去佢地網站睇下
因為佢地都有好多唔同o既檢查的,大家可以揀個適合自己o既計劃
http://procheck-hk.com/zh-cht/procheck-elite-check-up



2012年10月8日 星期一

1st Interview @ 青衣啟思

諗都無諗過咁快就要帶朗朗去Interview
成日係度諗,一個15-16個月o既小朋友究竟可以做到d咩呢?!
朗朗係一個比較多野講o既男仔
好早已經識講好多生字,所以我近期都教佢五官係邊,叫咩名,幾多歲
準備近接黎緊o既面試
近呢兩個月,我已經開始每晚都帶佢返家
陪佢玩玩具同埋學習
我發現返家多左,佢學習o既進度真係快左好多

見到啟思係Email度話只可以一個家長帶小朋友去面試
我就叫爸爸唔洗一齊去
唉,早知叫埋啦,原來係唔可以兩個一齊入去面試房咋
爸爸係可以陪住入幼稚園架
搞到我一個人又揹住朗朗、又帶住一大個袋
鬼咁"呢hea"

依時去到學校,係門口等時
朗朗已經好心急想入去玩
係門外走來走去,無時定
入到學校,佢見到d玩具已經急不及待走去玩
除左鞋一陣就聽到叫名
我又立即幫佢著好,準備去面試

入到房,連埋我共有3個家長,但只得2個老師進行面試
咁未到朗朗,只好比佢玩住枱上面o既玩具先
點知.....有架大拖車係度,oh my god
開正我個仔果瓣
過左15分鐘後,先有老師過黎in朗朗
我留意左佢好耐,佢好似唔多想行埋黎咁,我已經心有不妙
好啦,坐到埋黎又由得成枱玩具係度,仲拎多兩盤過黎 (朗朗繼續玩拖車中)
老師叫佢,佢都比到反應
但唔係樣樣野都做到 (因為好努力玩拖車)
朗朗做到砌積木,執返好d積木....etc
另外,都答到老師叫咩名
整體黎講,我覺得朗朗全程掛住玩多過做指令
呢間其實係我後備之選,但無諗過面試內容朗朗都未能夠完全完成
當然我唔會怪佢啦,因為我個人覺得15、6個月o既小朋友就一定係咁
有左一次面試經驗,起碼大概知道之後應該點做 ^^
呢間11月頭會有消息,我諗就算佢地會收朗朗
我都會再考慮會唔會交留位費 :p
繼續努力,希望入到心水學校,下年唔洗再去interview XDDD

2012年10月2日 星期二

六月小兔BB會專訪 Part 3 & 4 by Supermami

Part 3: http://www.supermami.com.hk/index.php/mami-tv/item/injunesmallrabbitbbmeeting03?category_id=16
Part 4: http://www.supermami.com.hk/index.php/mami-tv/item/injunesmallrabbitbbmeeting04?category_id=16

Part 3 & 4原來已經出左我自己都唔知添
睇返自己被訪問
真係有少少難為情o既感覺
haha
同埋唔睇都唔知自己講野時成日嘟咀
好似怪怪咁 :p

2012年9月28日 星期五

轉Illuma後得到的迴響

自從朋友們知道我幫朗朗轉左飲Illuma之後
四方八面不同o既媽媽朋友都走黎問我好多唔同o既問題
可能佢地覺得我揀得,一定有做下功課啦.....haha

最多人問o既都係.....係咪轉飲Illuma就會肥d?
我都明白身為父母都會擔心自己o既bb比同齡o既小朋友瘦小
有時聽人講呀邊個轉左食乜乜牌子o既奶粉後,肥左好多呀,跟住就一窩蜂轉食
其實每個bb o既吸收各異,就好似我地成人咁
有d人食極都唔肥,亦有人食量好少都成身肉 (我咪係呢種囉....嗚)
我就覺得邊度有肥仔奶粉架
不過,Illuma提及佢地奶粉裡面加入o既Sn-2係可以令到bb腸道更容易吸收營養
就好似,好多人話食菠菜好呀,補鈣質
但實際上係咪真係吸收到呢,又係另一件事囉
改善到吸收方面,自然更加健康
但都係果句,唔會個個bb轉食後都會變肥仔囉!!!

朗朗一直以來都唔係日日有便便去,但中途又唔想轉奶粉
初生頭兩個月,我差唔多全埋身餵人奶 (臨訓果餐奶粉)
朗朗最耐好似成5日無便便
果時都好擔心,因為睇其他朋友d bb飲人奶,餐餐食餐餐清
成日驚自己餵得唔好,係咪唔夠佢食,定係d奶有其他問題
後來我係母乳協會討論區度睇下有冇類似情況啦
原來好多bb都係咁
主要係因為人奶裡面o既養份比bb吸收晒,殘餘係bb體內o既廢物少,所以先唔日日有便便
果時朗朗真係儲埋儲埋一次過爆片架
所以好鬼怕2-3日無痾後出街,一定雞手鴨腳

嬰兒沒有大便怎辦?http://www.breastfeeding.org.hk/faq/86
初生BB吃人奶一個月後, 連續五六日沒大便,怎辦?: http://www.breastfeeding.org.hk/post/3338

所以我更加覺得吸收o既重要
我諗呢個先係我幫朗朗轉食Illuma o既主因

又有人問我....車,bb都大啦,係其他食物都吸收到其他營養,係咪真係要食d咁貴o既奶粉呀
咪又係果句囉,吸收好先有用架
吸收唔到咪又係排返出黎
而且飲奶都係一件有益o既事,好似我咁,我返工每朝都一定飲返盒鮮奶做早餐架
負擔又唔係太大,點解唔比個仔食好少少?
我寧願個仔食好d,健康精神d
好過用錢係咁催谷佢成為資優生

其實之前都有唔少報導講過Sn-2呢個成份架
http://news.hkheadline.com/dailynews/content_hk/2011/05/24/149199.asp
http://www.peegaboo.com/cms/index.php?page=content/stage/details&id=4952&stage=9&cat=67
http://the-sun.on.cc/cnt/news/20120525/00410_042.html


講真,身為母親,我都好想可以持續比母乳餵佢
因為我絕對相信母乳係bb最好o既食物
但我真係無能為力,之前我都有係blog度講過,我用盡不同o既方法去谷奶
仍然唔夠朗朗食,唔通我睇住佢餓咩
所以先比佢食一隻之前試過又無乜問題o既奶粉
但依家要轉,當然揀過度過先啦

wakakakakaka.....突然之間好似好嚴肅,係度做晒分析咁
可能對大家黎講,Illuma的確比較新,又唔係咁多bb食緊,所以真係太多朋友問我啦


朗朗食完奶奶做瑜珈 XDDDD



2012年9月25日 星期二

為報學前準備班(Pre-Nursery)做好準備

我自問都算係一個比較嚴謹同埋惡o既媽媽
但只限佢o既自理、品行方面
對於係咪需要咁細個就要佢學不同o既野、入名校....等等
我一直掙扎左好耐
自己都曾經係小朋友,當然希望返學唔好咁辛苦
放學做好功課就可以玩啦

但現今社會
好多家長都會比小朋友學多d技能
等佢地係學業方面有所幫忙
我諗都係因為香港o既教育制度問題
媽媽一直對我管教唔算嚴厲,同佢就好似朋友咁
因為咁,我係一個比較樂觀同開心o既人
所以都好想比一個快樂o既童年朗朗

但當見到其他媽媽為小朋友入小學o既問題
煩惱不堪、困難重重
我又再諗,究竟我應該點做好?!?!?
朗朗8個月時我有帶過佢返playgroup
但我當然冇諗過佢可以從中學到d咩啦、只係想佢開始習慣下同其他小朋友上堂
聽下歌仔玩下玩具咁
無辦法啦,身為Working Mama....陪到佢o既時間有限
所以盡可能比佢接觸多d
之後我停左一段時間,因為我好似太過密集咁比佢上堂
經朋友介紹,呢期開始上緊英基o既Playgroup
我就真係開始睇到朗朗學習同成長

有朋友同我講,比小朋友習慣辛苦,之後佢地就唔會覺得有咩問題
我見到『習慣辛苦』呢四個字,已經覺得好陰公
但我又諗,先苦後甜係咪比先甜後苦更好呢
所以我決定行中庸之道,盡量各方面都可以做到平衡 (希望做到啦)

八月已經開始為朗朗報學校
到依家已經報左四間
1) 栢基  2) 啟思 3) 康傑 4) 綠楊
黎緊會再報埋卓思
暫時得綠楊同卓思係要排隊交 / 攞Form啫
返PN班,一來想朗朗學習獨立、群體生活
二來希望減輕婆婆o既負擔
因為朗朗大個仔,成日無時停,婆婆雖然仲好後生
但又要照顧佢,又要做家務煮飯,仲要間中返Part Time
真係辛苦晒婆婆啦

荃灣綠楊排隊實況
連自己都無諗過,為左個仔
我可以5:30am起身,去到坐係地下等3個鐘頭
就係為左一個面試籌



前面o既人龍




2012年9月16日 星期日

六月小兔BB會專訪 Part 1& 2 by Supermami

從來無諗過自己會接受網站o既訪問架
估唔到我地個BB會都受人注意 ^^
我七月已經做左我第一個視象訪問
可能因為形式係傾計咁啦,又唔洗望實鏡頭
總體黎講都唔算太過緊張

Supermami (http://supermami.com.hk/) 已經將Part 1 & 2 登左係佢地個網站啦
睇返段片先發現
原來朗朗成日豬咀係似我囉 :p

六月小兔BB會的誔生

Part 1 - 點解會成立6月小兔BB會呢?

http://supermami.com.hk/index.php/mami-tv/item/injunesmallrabbitbbmeeting01?category_id=16
Part 2 - 成立6月BB會後會員有什麼得著?
http://supermami.com.hk/index.php/mami-tv/item/injunesmallrabbitbbmeeting02?category_id=16

其實Supermami網站裡面都有不少有用o既資訊架
大家都可以得閒去睇下
佢地間中都會搞一d 小朋友 / BB選舉比賽架
有興趣可以留意下佢地網站或者Facebook Page: https://www.facebook.com/supermami.com.hk?ref=ts

另外仲有倩揚媽媽同大家分享育兒心得添 ^^
http://supermami.com.hk/index.php/mami-tv/starfocus/

2012年9月13日 星期四

意外驚喜

早幾日咁岩婆婆唔得閒湊朗朗
加上佢有少少唔舒服,我就帶朗朗去睇醫生
呢個醫生keep住睇朗朗一段時間架o勒,朗朗傷風感冒、濕疹等等都係睇佢
同醫生傾開,我就問下佢對Illuma有咩意見
醫生都有同我解釋下Illuma同其他奶粉有咩分別
醫生話奶粉加入左Sn-2成份係有便bb腸道順暢同埋吸收更好
我就更加放心比朗朗試

第一次幫朗朗轉奶粉
先轉早餐開始
但估唔到第二日,朗朗已經唔肯飲思敏兒了
而且出奇地非常鐘意飲
見佢咁鐘意,我自己都試左啖睇下係咩味
飲落去有淡淡的雲呢拿香味,但一d都唔甜喎
但我好肯定一定比佢食開的思敏兒好味
所以朗朗先會咁快轉軚
轉奶粉其實最怕bb腸胃一下子接受唔到個變化而有所影響
但見佢d便便都無問題,仲比之前好左添,我就放心全部轉晒了


朗朗食奶咁耐,除左人奶佢係會飲到底之外
其餘的永遠會淨返少少架
但依家佢除左好快飲完一支奶之外
永遠一滴不淨
飲完仲好似唔多夠喉咁,扭我再開比佢
朗朗真係乖仔,緊係知道要幫媽媽慳返D奶粉錢
所以少少都唔嘥
真係一個驚喜呀


大爺朗朗飲得幾招積 ^^



5分鐘左右就飲晒250ml啦
仲係咁啜啜啜



發現真係冇晒就係到扭計啦
喊晒口想我再開比佢 = ="


2012年9月4日 星期二

《親子雜誌》& 百靈牌 -『嬰幼兒健康預防秘笈講座』

耳探操作示範:

早前出席左由《親子雜誌》同埋百靈牌主辦o既『嬰幼兒健康預防秘笈講座』

本來諗住帶埋朗朗一齊黎架,不過佢有約 ^^
講座未開始前,可以去百靈牌個counter度了解下佢地o既產品
包括佢地最新出的 "耳背體溫計 (BET1000)"
好多時用耳探,BB都一定會唔鐘意甚至係撥開
呢個產品特色就係可以係BB熟睡時使用,而且又冇咁易整親/整醒BB
一秒就可以測量到BB當時o既體溫度數

最正o既係,耳背探上顯示體溫的屏幕除左可以顯示體溫外
仲會同時有三個顏色的背光顯示燈

每個色代表BB當時有冇發燒,就算深夜係房間燈光暗時都馬上知道呀嘛

綠色 = 無發燒
黃色 = 體溫偏高
紅色 = 發燒



講座開始大家就開始坐定定啦
由兒科專科鄭碧純醫生同我地講解



原來中大做過研究,初生bb出世時體重同埋身長o既平均數
如果bb (足38周) 出世時體重少過2.5kg又或者身長短過45cm都算係小於胎齡
朗朗都算係岩岩合格咋.....出世2.74kg



其中一part係講濕疹
我當然非常留心去聽啦
因為朗朗之前一直有濕疹問題,雖然依家好似差不多好返晒
但我怕仲未斷尾架嘛,了解多d一定有幫忙
有濕疹bb的媽媽可以參考下啦
其實我之前都有寫過少少有關濕疹護理的blog: http://blog.yahoo.com/pandacarmen/articles/664767/category/%E6%96%B0%E6%89%8B%E5%AA%BD%E5%AA%BD


之後就介紹返百靈牌o既耳溫槍
其實我一直都冇買架
原因係,我妹妹話我知,佢覺得唔準確 (聽完個講座後終於知咩原因囉...haha)


量度身體每個部份都有不同o既準則


百靈牌最新款o既耳溫槍,除左耳背體溫計外,另一個新型號係 - IRT4520
其實用法同之前o既型號大同小異,新加o既功能係有8個記憶紀錄
咁就可以清楚記低BB發燒時o既進展啦


當日就帶左呢部機返屋企用啦
咁岩朗朗早兩日開始發燒,真係岩晒



拆開就見到耳溫槍o既說明書同保用書等等


耳溫槍有個兜盛載住,咁就唔怕周圍放整污糟啦
新型號係用電芯的,比之前用電池的比較方便


打開耳溫槍,裡面仲附有20個替換o既耳套
設計方便


耳溫探可以度到攝氏 / 華氏溫度
一click開機,就出現攝氏符號


如果我想用華氏
就要keep住click個制,直至出現華氏符號後放手
再開機,之後每次就會顯示華氏度數
若果想轉返攝氏,做法都一樣


我習慣睇攝氏,所以我set返好後就幫朗朗探下熱
衰豬唔慣我放野入耳仔,搞左輪先得 (haha....加上又要邊影相邊探)



good!!!! 已經無晒燒啦


之前咪提過我妹話覺得佢唔準確o既
原來大家都忽略左一件事,好多人認為部機只係一個bb用
係衞生角度,無需要次次換耳套
但其實耳套除左衞生d外,亦都會影響每次測量溫度的準確性
所以大家記得每次更換呀

2012年8月16日 星期四

獨自去偷歡 之 試玩灰熊山谷

朋友問有冇興趣玩灰熊山谷
我呢個咁懶玩精當然唔錯過啦
但由於已經去過幾次,加上年假不多
所以決定放半日假同朋友去,飛甩爸爸同朗朗
不過由於去過咁多次,加上試玩要六點半後
所以我都係請左半日假咋,慳返D嘛,有左小朋友之後
大部份o既假都留返比佢咁滯

嘩!!!!! 估唔到暑假的星期二咁多人
人又多,天氣又熱
第一時間去左shopping先
買夠後先去玩

不過真係度度都多人都癲
上次去冇玩到"Toy Story Land" o既沖天搖控車
所以決定用一個鐘去排
熱足一個鐘,上去玩兩分鐘


人多就有呢樣唔好~~~
仲有....太多同胞啦,講真....都仲係接受唔到佢地D插隊文化
同埋係又迫,唔係又迫一餐埋你身
真係好憫
之後都係周圍HEA下影下相咁啦





等時間過,見差唔多就去睇返場獅子王慶典
睇完出黎時間岩岩好呀
準備入灰熊山谷啦
我地已經諗好左,第一件事去玩極速礦車先
因為係試玩,所以應該大部份人都係香港人
感覺真係同之前爭D架,雖然人多,但無你推我撞咁呀
唔洗五分鐘,我地就上左礦車啦
雖然唔算得上係好刺激果D 機動遊戲,但我覺得都好正呀~


之後就排隊同米奇米妮影相
影相期間發現礦車有故障
真係慶幸我地早玩早著啫
影埋相都天黑啦
咁就完全一日開心之旅
真係多謝朋友比個機會我,早d去試玩迪士尼的新遊戲