5月2日，朗朗學校舉辦左一個表演活動
名為《父母親節獻禮》 - 『 童來頌讚』
我想大約係表演一個多月前已經開始綵排
因為間中聽到朗朗係家唱新歌同跳舞
期待以久的日子話咁快就到
早兩日領取左有型嘅表演服
一切準備就緒
當日我全日放假，親自帶朗朗去理工大嘅學賽馬會綜藝館
放低朗朗比老師後就離開
朗朗就同同學仔一齊進行最後綵排
然後我就等埋爸爸、嫲嫲、婆婆 & 表哥仔Ocsar
午膳後就行返上理工等候入場
遠遠望入綜藝館
已經見到好多家長聚集左係度，好熱鬧
劇場入口有迎接我地的高班哥哥姐姐們
除左有禮貌咁同我地打招呼，仲送上漂亮嘅絲花
坐低後就見到學校為今次活動準備嘅場刊
果然好認真
首先有校長致詞，再由梁永善牧師同我地分享
就正式進入表演環節
並首先由下午N班同學開始
由於我坐嘅位置望向朗朗企嘅位置有點遠
所以我無拎起相機影相
專心欣賞表演
雖然朗朗仲係有少少怯場
不過係爸媽心目中，朗朗表演已經十分出色
睇完其他精彩嘅表演後
就邀請爸媽們上枱，接受小朋友親手送嘅禮物
然後再接朗朗落台睇埋餘下嘅節目
奕朗呢個咁有型嘅白馬王子造型
已經深深動搖左媽媽嘅心
我已經深深對朗朗著迷了.............wakakakaka
朗朗嘅新畿內亞鳳仙開花啦！
3月3日見到3個花苞
3星期後終於都等到佢開花
26-3-2014
31-3-2014
1-4-2014
3-4-2014
唔好話朗朗呀，連我自己見到開花都好興奮
我同朗朗就成日去留意住佢開花嘅情況
朗朗成日都話：「好勁呀！好緊張呀！」
好好笑
一次過三朵花盛放真係好靚
尋晚最早開花的一朵掉落了
希望我地繼續悉心裁種下
會有新花苞出現啦
奕朗第一個參與嘅學校動運會
由於係聯校舉辦的
因此選址係三間學校的中間點 - 馬鞍山的一間小學內舉行
運動會中，N班小朋友最多可以係4項項目中選3項參加
我幫朗朗參加左3項比賽
包括 1) 擲豆袋 2) 大力士 3) 賽跑
奕朗的號碼布
搭旅遊巴到達會場
我地就聽指示，等候各項目開始
估唔到朗朗可以同讀緊馬鞍山正校的朋友仔正嵐同一組比賽
奕朗好期待比賽開始
未輪到佢時，就係場邊同其他同學仔打氣
大約半個鐘左右，就到奕朗出場啦
第一個項目係"擲豆袋"
開始前我大約講過點樣玩呢個項目
就係鬥掉得遠
見佢之前係場邊睇左咁耐
我諗佢已經明白點玩啦
所以一埋到位我就將豆袋交比佢
hahaaaa....一吹雞
朗朗就好隨意嘅掉出豆袋
豆袋只係喺佢面前約2步嘅距離
當然，媽媽並無取笑啦
我仲讚佢叻仔添
朗朗好開心
之後我就陪佢上一樓拎食物
原來一樓有3個課室設置左遊戲
攞完野食就帶佢去玩
仲一次過玩晒3樣添
之後我地又落返禮堂等候第二個項目開始啦
今次係"大力士"
各參賽小健兒鬥快將放係起點嘅A4紙箱拉去終點
我就係終點位置等候
好快就完成第二個項目
我地就出操場排隊玩充氣彈床
休息一陣食下野就到第三個項目"賽跑"
當然又係鬥快啦，我又係喺終點等候
朗朗好快就跑到我度，我初初睇覺得佢最快添
但老師判左另一位出線
我當然無異議啦
最緊要係朗朗玩得開心
完成所有項目，我又再同朗朗排隊玩彈床
期間仲遇到同學仔浩賢一齊玩添
睇下兩位小朋友幾興奮
跳完又再上一樓玩遊戲
好彩快手咋
因為已經陸陸續續收檔
準備之後嘅頒獎及表演時間啦
全部小朋友都聚集係禮堂等
一開始就一齊大合唱 + 跳舞
咁多小朋友一齊唱『我強』
真係好可愛
然就睇埋表演同頒獎就完成整個活動啦
因為約左爺爺嫲嫲
所以我地自行係馬鞍山離開
臨走前去老師度領取參與獎牌一個
朗朗收到獎牌，超開心
我都好開心可以陪仔仔參與運動會
唔知日後會唔會有親子比賽呢~~
奕朗每星期都要做閱讀報告
咁細個，當然唔係要寫字啦
主要係由爸爸或者我講故事比朗朗聽
再問朗朗鐘唔鐘意呢個故事
如果鐘意就係閱讀報告冊度填色
填得越多 = 越鐘意
上個星期學校派左由小樹苗出版的圖書 - 《沒洗髮的莎莎》
大旨係講莎莎因為玩到好污糟
又唔聽媽媽提示去沖涼
搞到自己好臭，朋友仔又唔同佢玩
最後返家立即洗乾淨後
就變返香聞聞的清潔小朋友
然後，過一日我地一家去BBQ
返到家，爸爸幫朗朗沖涼
出黎就由我幫朗朗換衫
朗朗第一時間叫我聞下佢
朗：我洗左頭，係咪好香?
我聞一聞答：係喎
然後朗朗再聞一聞未沖涼嘅我
朗：咦，媽媽好臭，同莎莎一樣
我：囧
雖然果一刻囧一囧，覺得朗朗好似有心"扇"我咁
但諗深一層，證明佢有留心聽我講故事，亦都明白當中意思
仲會好好咁運用
真係唔好睇少一個兩歲幾嘅小朋友
朗朗學校上年12月時派了一盆小花苗回家
我返到屋企睇通告先知
原來朗朗學校參加左康文署嘅一人一花計劃: http://www.lcsd.gov.hk/green/b5/one2013-14.php
康文署嘅宗旨係想藉著此計劃向學生推廣綠化意識、培養他們對種植的興趣及對社區的關懷。
學校更教導小朋友們尊敬長者
因此學校嘅一人一花計劃，命名為『愛護樹苗，尊敬長者』大行動
鼓勵小朋友愛護花苗，將用心機種好的盆栽送給尊敬嘅長者
好可惜，朗朗拎返家嘅新畿內亞鳳仙花苗，未返到家時感覺己經淹淹一息
放多兩日已經返魂無術
所以拜託左朋友幫我留意四周，有冇新畿內亞鳳仙嘅花苗買
好彩當時都仲搵到花苗買
朗朗嘅花苗就寄居左係朋友家一陣時間
我到1月頭先得閒拎返屋企
但烏龍嘅我，竟然係旅行前一日帶佢返屋企
好彩只係去四日，唯有聽天由命啦
幸好旅行返黎後佢仍然好健康
咁我就正式同朗朗一齊照顧小小的花苗了
康文署網頁內，有種植方法嘅資料，大家都可以去以下連結下載
新畿內亞鳳仙栽種講座(講義)
新畿內亞鳳仙資料單張
新畿內亞鳳仙栽種示範
其實新畿內亞鳳仙唔係好適合係天氣凍時種植
因為佢需要多水份、多陽光、同溫暖的溫度先可以茁壯成長
所以係天氣凍嘅時間，夜晚我多數會將佢放入飾櫃
開住飾櫃燈當晒太陽
14-1-2014
過幾日就買齊野幫佢換盤
然後幫佢摘心
摘心後約一星期，長多左好多新葉同埋長高左不少
然係喺指定日子，將盆栽送比婆婆
影返張靚相交功課
之後當然再帶返家繼續由我同朗朗照顧啦
朗朗經過我提點，每次淋花都好小心
盡量唔會比水掂到d葉
拖肥亦一樣
15-2-2014
19-2-2014
26-2-14
經過我地悉心嘅照顧
奕朗嘅新畿內亞鳳仙終於長出3個花苞啦
3-3-2014
依家好期待佢開花的日子 ^___________^
