自家菠蘿酵素

見朋友們製作唔同嘅酵素
又聽到大家都講不同酵素嘅功效有幾好
心思思又想學人整黎飲下
上網搵可以見到好多人都有教點樣製作酵素
我就跟鬼嫁料理手帳去做，裡面有好詳盡嘅做法同解釋 
大家都可以入去睇下

材料同埋工具其實好簡單


工具:  可密封玻璃樽1-2個

材料:  菠蘿 1kg
           檸檬 / 青檸 2-3個
           冰糖 約500g (水果重量的50%)

搵左好耐先發現，原來唔係度度嘅生果舖會幫客人開菠蘿架
其實我屋企樓下街市有間會開，但我放工返到去佢都收檔lu
最後因為心急，我係超級市場買現成開好切晒嘅黎整
我好蠢，唔識買啲size細啲嘅冰糖黎用
搞到要自己係家係咁揼碎少少黎用 :( 

消毒好所有用具後就開始入樽
記得啲用具同生果都要風乾，唔好用廚房紙抹
仲有一定唔可以有水係任何用具上，唔係就可能會失敗
一層菠蘿、一層檸檬、一層冰糖
如是者，一直鋪到樽頂 (預留一寸位置)
最後一層要係冰糖 
然後密封，放係乾爽處等兩星期
我見分享話可以每日開樽散氣，咁酒味就無咁重
我就選擇完全唔開 XDD

Day 1

Day 6
因為天氣凍嘅關係，發酵時間好似比較慢
差唔多第5日先開始嘔泡 (發酵中)

Day 9
日日都會睇下佢地點
第九日出水已經7788
可能啲冰糖太大啦，好耐都溶唔晒 XD
我另外買到一個新鮮嘅菠蘿再整多樽添

 



Day 14
第一樽收成啦
雖然份量唔多，但都ok啦

我仲將部份剩餘嘅果肉放埋去新果樽度做菌種添
呢樽我睇情況會唔會浸耐少少先收成

依家開始每朝起身空肚飲30ml
希望真係有排毒美顏，整腸通便嘅功效

奕朗之儲蓄

朗朗由未出世果年嘅新年
已經收到不少長輩嘅利是
所以我係2011年8月時已經幫朗朗係渣打開左兩個儲蓄戶口
分別係港元同人民幣戶口

當初只係貪佢本簿仔靚
同埋於指定期內存指定金額有野送
咁朗朗每年再收到嘅利是錢都會存入去
但其實真係得個存字
一來依家利是有等於無，二來個人覺得渣打服務一般
所以近期開始物色其他銀行

問過其他媽媽朋友意見
發現都無乜邊間有特別
然後又見大新嘅兒童儲蓄戶口有Thomas & Friends喎
有Thomas主題嘅存摺外，仲有張印有小朋友相片嘅存款卡
存款5千蚊以上超過一個月，額外送Thomas行李牌一個添
為左朗朗可以有一套咁靚嘅銀行簿同卡
好快我又去大新開左一個戶口，將朗朗嘅利是錢由渣打戶口轉過去

Thomas & Friends™ 兒童儲蓄戶口  









點知過幾日，有媽媽介紹
原來永亨有個 My Kid 儲蓄計劃
My Kid 儲蓄計劃單張: http://www.whbhk.com/webpages_cms/files/Index/Chinese/my%20kid_web%20page_Chi_Jan2014.pdf
存款利息最高可以去到1.75%
大概係先選定每個月存款金額同埋期數
於指定日子後就可以連本帶利取走
即係零存整付計劃
利息當然以不同嘅供款年期而有所不同

12個月 - 1.25%
18個月 - 1.5%
24個月 - 1.75%

其實自己每個月都有儲錢架啦
橫掂都係不如揀左有好少少利息嘅戶口黎用
哈~~最後我又馬上走去開戶
仲揀左兩年期，享盡最高的1.75%
另外，除左供月供嘅錢計利息
開戶時存入同埋第二年農曆新年(初四後一個月內)存入嘅錢都可以計息
呢個不失為一個無風險又年期短嘅儲蓄計劃

    















推廣期只係去到2月28日
想開就快手啦！

btw.....我要搵日去取消朗朗係渣打銀行嘅戶口先得 :P

麥當勞® 開心樂園餐® x 《百寶狗先生與細蚊：時光機大歷險》

麥當勞® 開心樂園餐® 每期都會為大家準備不同嘅玩具
黎緊嘅星期五 (21/2) 開心樂園餐® 又再為大家帶來新款玩具啦！
我同朗朗更有幸能夠優先得到一套6款最新嘅玩具添
多謝 Bravo Gloria 嘅安排
上午問我拎地址，下午已經送到啦
一見到個巨型開心樂園餐盒，我已經好開心

 



















返到家，朗朗見我拎住咁大個盒，覺得好驚訝
馬上要求我拆開
但我話要晚飯後先可以拆，佢勁期待
一打開見到啲玩具，朗朗立即嘩嘩聲......haha
媽媽當然唔比佢立即拆開黎玩啦
影返幾張相先
朗朗話要擺返個pose先影 XD

一套6款玩具造型以電影《百寶狗先生與細蚊：時光機大歷險》為主題
電影中，百寶狗先生係一個偉大嘅發明家，聰明絕頂
所以今次嘅玩具以電影中不同嘅角色，配合特別的小遊戲
等小朋友們可以動動腦筋 ^^
拆開後，朗朗已經急不及待逐一玩下
最鐘意玩繽妮旋轉砌圖

上行：
(左)  百寶狗先生金字塔
         推出日期：21/2 (五)

(中)  百寶狗先生彈珠器
         推出日期：28/2 (五)

(右)  繽妮旋轉砌圖
         推出日期：21/2 (五)

下行：    

(左)  細蚊滑翔機
         推出日期：14/3 (五)

(中)  獅身人面迷宮
         推出日期：28/2 (五)

(右)  雙面迷宮時光機
         推出日期：7/3 (五)

玩具由聽日(21/2)開始，隨麥當勞開心樂園餐® 附送
或者可以買任何套餐加HK$8 換購一款
大家想集齊6隻玩具，就要記住推出日子啦！

《百寶狗先生與細蚊：時光機大歷險》將於3月6日上畫
到時可以帶埋小朋友一齊去睇啦
依家睇住預告片先啦~~~~

梁C9主理的情人節大餐

我諗由結婚開始
已經無再係情人節果日出街食飯
真係唔想再同人迫餐懵，又限時限刻咁食餐飯
今年情人節又係由梁C9出馬煮大餐
由於情人節前一晚同老公去睇戲
所以早兩日就去買定餸

一收工已經一個箭步飛返家
到家都已經7點啦
係樓下買埋少少野後，就立即不停手整整整
朗朗就等老公返黎先接返黎

 
餐單
- 芝士火腿焗燒烤菰
- 煎肉眼扒
- 白汁芝士火腿西蘭花
- MU Macaroni Cheese (特別為朗朗而設)
- 白汁雞蓉忌簾湯 (罐頭湯 XD)
- 甜品 (1) Miss B cake
- 甜品 (2) 朱古力士多啤梨

快快手都搞到夜晚8點9先開餐
好彩叫婆婆餵朗朗食飯先
但朗朗一食個芝士粉就食唔停
差唔多食左大半碗咁滯
亦都難得老公都讚我有進步呀~~
雖然呢餐計返都唔平
但係屋企同兩個最愛食大餐，夠晒溫馨
點都好過同人迫啦

BTW...Miss B 啲cake好好味呀

 

朗朗第三個農曆新年

2011年出世嘅朗朗
今年渡過左佢人生第三個農曆新年

2012年
只得半歲大嘅朗朗又邊有咁快識拜年
我地都只係教佢雙手握實拳頭同各位親朋戚友請請咋

朗朗著起小王爺套裝真係份外招積

 
 















婆婆都買左一套中式套裝
著起都好醒神架

2013年
朗朗已經15個月大
係ESF上緊playgroup
大家著起賀年服飾做賀年裝飾
岩岩識行無耐嘅朗朗，仍然對新年無乜概念

 

右邊嘅燈籠就係朗朗同媽媽一齊製作架啦

2014年
返緊PN班嘅朗朗已經31個月大了
每逢節日將至，學校都會舉辦不同嘅活動
介紹節日的意義，同埋等小朋友可以感受下節日氣氛
學校除左教朗朗唱新年歌同拜年外
仲搞左兩個活動，分別係"年28，洗邋遢" 同埋 "行年宵"
所以朗朗對農曆新年認識深了

著華服上學

 
 

年28，洗邋遢

返到屋企

朗朗都好幫得手

見到我係度準備佈置同埋入利是

都主動要求幫忙

所以今年開始，我多左一個好好嘅幫手

入利是 ^___^

起初未掌握得好

一係就開唔到利是封口發忟憎

一係就幾張入落一個利是封度

經教導後，佢終於可以逐封慢慢入好 (我當然要從旁協助啦)

入賀年全盒

幫我將不同嘅賀年食品同埋糖果放好

其中一層就放左朗朗係學校行年宵後帶返黎嘅糖果

睇下佢完成後幾有滿足感 

最後當然要帶佢行下花市啦

今年真係第一次行花市

我地揀左近近地嘅葵芳花市行

朗朗見到四周都係不同嘅花

覺得好新奇

  

學識拜年嘅朗朗好好口

見到長輩們都會講

"祝你身體健康、心想事成"

收到利是會回答"多謝"

除此之外，朗朗每次都肯表演學校教嘅新年歌比大家睇添

新年到，哈哈笑

大家真快樂

穿新衣，吃年糕

大家真快樂

祝大家身體健康.....Yeah!!!!!!!!!!!! 

大個仔啦，媽媽無專登再買賀年衫比佢著

年初一打扮得好有型咁去拜年

見到財神公仔，仲擺左個好有型嘅POSE去影相添

 

有時見到朗朗，一見大家一窩蜂咁去長輩度逗利是
佢就有樣學樣，馬上走上前講恭賀說話
拎到利是就勁開心，然後再交比我
相信佢好享受逗利是嘅過程

整個新年，我地都去左好多親戚家拜年
朗朗亦都跟爺爺嫲嫲去左不同地方玩
非常充實呀~

 

2014 沙巴遊 - Day 4 (市立清真寺 & 加雅街)

呢日冇乜特別行程
所以食完早餐就返房收拾好行李

 

搞掂晒就check out同寄存行李
再經concierge幫我地call車
送我地去市立清真寺 (City Mosque)
之前我上網search過其他人嘅遊記
知道搭的士去清真寺大多以時租計算，約RM40/hr
咁我地12個人，司機都係收我RM120
包我一程到清真寺，停留影相再送返出去市區
我覺得都算合理


市立清真寺 (City Mosque) 

Masjid Bandaraya Kota Kinabalu 

其他到達方式：巴士 - 旺旺山百貨商廈(Wawasan Plaza) 前的巴士站搭乘 5A、1A號線

                            前往UMS方向，收費約RM1.5/位
開放時間：每日 (週五除外) 早上8點-下午5點 

                    星期六 早上9點-上午11點

門票：免費參觀 (衣著端莊)

車程大約15分鐘就到達
落車就見到坐立係人工湖上的清真寺
雖然天色灰暗，但都冇影響我地影相嘅心情

 
我地只係喺外面影下相咋
無入去裡面參觀
然後都上車去加雅街 (Gaya Street) 食晏
適逢星期日，加雅街有週日市集 (Sunday Market)
所以當日街上好熱鬧
街上擺左好多不同嘅攤檔
有小食、水果、手信、衣服等等，包羅萬有

我地一早已經有目標架啦
就係去出名嘅怡豐茶室食叻沙啦!!
由落車果度行到去差唔多街尾先見到

餐牌全部貼晒係牆上面
大家想食乜野叫number就可以啦
唔洗諗，黎到當然食叻沙啦，朗朗就食魚丸粉
味道不錯，但未去到一試難忘嘅地步囉 :)

食飽就過去Central Point行多陣
原先想去超市睇下買唔買到地道叻沙醬返香港
可惜買唔到
只買到好抵嘅藥品同埋朗朗搽開嘅保濕Cream - Ezerra
然後我地就分批出發去機場lu
老公同公公就先返酒店拎行李，我地就另外叫兩架車去機場
搞掂晒Check-in後就坐低食少少野
裡面仲有間好似士多嘅商舖，我地仲可以繼續買野
最後買左3 pack 果味雪條就上機lu

機上見到好靚嘅日落，無耐就到達香港
4日3夜之旅順利完成
唔知幾時再有機會，咁多人一齊去旅行啦 ^^ 

  

2014 沙巴遊 - Day 3 (Weston 生態巡遊 - 紅樹林睇長鼻猴 & 螢火蟲)

早上如常到餐廳食個豐富嘅早餐
之後就到 Pacific 同 Magellan 中間嘅泳池玩下水
呢邊分開幾個不同嘅泳池
有標準池、兒童池同埋玩樂池
玩樂池仲有滑梯同瀑布添
泳池對住碼頭，風景好靚
玩到差唔多時候，我地就返房間梳洗
準備之後嘅活動啦~

今日安排左特優旅遊嘅一日遊 - Weston生態巡禮+長鼻猴+螢火蟲
其實起初想揀其他行程架
但長鼻猴係婆羅洲特有嘅野生動物
黎到無理由唔近距離欣賞一下珍稀嘅動物架嘛

行程:
酒店來回接送、下午茶、河畔馬來風味晚餐、生態河遊、螢火蟲之旅

我地係 Pacific Sutera 上車，集合時間係下午1點半
然後再到 Shangri-la 接埋其他團友
呢團全車爆滿，果然受歡迎呀~

失策嘅係我唔記得提提大家食定嘢先
因為車程都幾長
好彩婆婆醒目，係小食店買定兩份三文治比小朋友食
行程途中係一間朱古力專賣店停留左陣
我地都買左少少上車食
朗朗又點會錯過呀

跟住就係兩個多小時嘅車程
同朗朗玩玩下，我自己都訓著左
中途比架車震一震醒左，發現原來旅遊巴司機係車手
逢車過車，搞到我唔敢再訓 = ="
唯有沿途睇下風景

呢日由上車開始就落住雨，一直都無停過
大約4點就到達 Weston (威士頓生態區)

先到居住係紅樹林附近嘅水上屋家庭食特式下午茶
呢個時候，雨開始停了，真係好彩
雖然唔係好知食緊嘅係咩食物，但可能肚餓啦

覺得幾好味，食多幾舊先走~~ 

5分鐘路程就到上船嘅地方

為確保安全，大家上好船後都要著上救生衣

然後就起航，駛向紅樹林 

去到紅樹林旁無幾耐就見到長鼻猴啦

可能落完雨水位高左

所以啲長鼻猴係樹上，甚至樹頂我地都可以清楚見到

兩位小朋友見到當然興奮啦

朗朗仲同我講，啲馬騮仔係度傾計喎 XDD

大約20分鐘左右

我地就埋岸上船食晚餐啦

難得有導遊係度，我地終於可以影返張全體大合照

跟住導遊行，經過一間水上屋餐廳

以為會係果度食晚飯啦

點知唔係囉，我地只係去另一家馬來西亞家庭度食簡單晚餐

色香味都係一般

飯後大約6點左右，天已經好黑了

我地又再上船去紅樹林

其實之前我去KL都睇過一次螢火蟲，但果時得果幾隻睇

估唔到今次去到樹林

見到滿樹都係螢火蟲，感覺棵樹就好似一棵著左燈嘅聖誕樹 

而且仲有兩隻螢火蟲飛左入我地隻船添

第一次咁近距離見到

雖然影唔到相留念，但當時嘅景象已留係腦海中

之後又坐返兩個多小時嘅車程返亞庇

我麻煩導遊送我地到市區食宵夜

我地先去天橋底買老公最鐘意食嘅榴槤

呢晚無買到貓山王，買左一個D24

睇下呢兩位人兄幾認真咁揀 XD

 

然後我地就去就近嘅菲律賓夜市食宵夜

果度好多檔口，主要都係食海鮮的

求其揀左檔有串燒的檔口坐低食少少野

然後等幾位榴槤愛好者食埋佢地嘅嘅正野就返酒店啦~

返到酒店都成11點幾，第一晚玩到咁夜先返