4月5日 (30w3d) - 第一次出外影大肚相

我一直寫開blog架嘛
有日收到一個城大女生 Hoi Lam o既留言話想搵我幫佢
完成佢攝影系畢業作品《Maternity: Mother and child》
我好有興趣呀
一來可以幫人，二來又可以試下比人影
所以就馬上回覆佢
但一直都仲係傾談當中
未正正式式確實拍攝日子同時間

直到6月媽咪會有位靚媽有日出post話佢都幫手做左model後
我就立即約實佢 (因為之前都有少少擔心，唔知需要影d咩)
後來我地定好日子
佢就詳細咁解釋佢o既作品想表達d乜野
會用咩角度去拍...等等
咁岩原來另一位6月靚媽都約左佢喎
我地就相約一齊去，有個伴呀嘛

去到城大後
就有義務幫手o既學生幫我地化粧
Hoi Lam又再解釋一次拍攝主題
由於佢都知道依家好多孕婦都鐘意去studio影大肚相
通常果d相都會表達孕婦幸福快樂o既一刻
但佢想表達我地係懷孕期間o既憂慮同不安
所以我地都要交少少戲出黎

大約影左2個鐘左右就完成
過程其實都好開心
無諗過會同另一個大肚靚媽一齊去影相
我地都影左不少合照架
等Hoi Lam整埋好d相之後就會send返比我地
好期待呀