Day 10 - check黃疸

由於之後幾日係假期同星期六日，所以要四日之後先再返健康院check黃疸
去到照樣磅重同讀指數
唔知點解....亞仔輕左 >0<
由2.74kg跌到去2.66kg........果一刻好驚，黃疸指數冇下降
等見醫生果時囉囉鬈...係度諗係咪自己餵人奶餵得唔好呢
好啦，入到醫生房，醫生一見d磅數跌左係咁話唔正常
咁我問佢係咪我餵人奶有問題，佢就只係話總之bb呢一刻輕左就好大問題
搞到我好擔心，黃疸指數冇下降
佢又話要入院check，但我唔想亞仔又抽血咁慘
咁醫生就話一係觀察多一日
原來bb有黃疸係比較攰，所以一定要準時餵奶，就算夠鐘佢未訓都要整醒佢
唔怪得呢幾日覺得佢咁好訓啦
返到家同亞仔沖涼後發現佢開始甩皮，之前明明冇架bor
心諗唔通依家先黎收水
立即問下其他媽咪啦，原來大部份bb一出世就甩皮收水
但點解我個仔會咁遲先開始呢 @@
佢地話可能係呢個原因bb輕左，果下都冇咁擔心
之後就照醫生咁講，每兩個鐘整醒亞仔飲奶
希望可以快d退黃啦

Edwin @ Day 6 - 返健康院

本來Day 5就同Edwn返健康院架
不過去左遺傳病篩選組，所以改後左一日
呢日一早就準備好
去到健康院登記就等磅重
好開心，Edwin o既磅重竟然比出世重左0.1kg
因為通常bb出世後都會收水，但佢已經有增長
的確係好消息
之後見姑娘，姑娘除左幫我登記好紀錄外
仲幫我跟進餵人奶o既情況
我話佢知，依家我都仲係人奶+奶粉
但姑娘一望就認為我有足夠o既母乳餵亞囝
所以鼓勵我全埋身餵人奶
仲教導我正確o既姿勢
姑娘比左信心我，我立即決定開始做奶媽
另外，由於亞囝有少少黃，所以要見醫生
醫生double check後認為指數有少少高
所以建議我帶亞囝返瑪嘉烈抽血檢查
亞囝人仔細細已經抽過好幾次血了，真係可憐
不過都冇辦法啦
好彩check完後，醫生認為唔需要留院照燈
唯有希望亞囝可以快d退黃啦

今次post Edwin仔o既天殘腳比各位睇
就係呢對腳仔係媽媽肚裡面不停咁踢踢踢

Edwin @ Day 5 - 甲狀腺檢查

Edwin好叻豬，pass晒醫院所有test
係day 3已經可以同埋我一齊出院
但係返到屋企第二日就收到遺傳病篩選組o既電話
話Edwin o既甲狀腺報告唔合格
要返去再抽血驗，收到電話果一刻有d擔心
雖然我冇甲狀腺素過高或過低問題
但我o既甲狀腺確實生過水瘤，所以我都怕咁樣令到Edwin都有事
Edwin出世第五日我就帶佢去蘇屋果間健康院內的遺傳病篩選組抽血
去到先聽講座，大約了解甲狀腺問題起因同埋治療方法
聽姑娘講，之後臍帶血個報告唔合格
有可能係因為生產過程收到壓力而有所影響
希望Edwin可以pass今次個檢查啦
除左Edwin外，仲有好多BB都需要抽血
排隊期間，同另一位媽咪傾計，佢個囡囡已經抽第四次了
聽到都戥佢陰公呀
真係唔想Edwin好似佢咁要做咁多次test
抽完血就走得，只要一個星期內收唔到佢地電話
就唔洗再返黎抽血再test
千祈咪收到電話呀~~~~

我的18小時產程

新手媽媽真係忙到不得了
分享下我誕下小Edwin o既過程

5月28日凌晨5點左右，訓訓下感覺到有少少水漏出黎，以為要去廁所啦，去洗手間後覺得唔似小便，諗住再睇多陣。之後眼光光係度等，約六點又到去廁所，發現除左水仲有少少粉紅，立即話比老公知，同佢講我要沖涼準備入院啦，我仲見冇陣痛鬼咁滋悠....最後八點幾去到產房，好快確認穿左水就正式上產床，老公幫我搞掂所有入院手續後就返屋企等候。

但由於我穿左水但未開始陣痛，醫生話最好催生，唔係bb好易受到感染，所以我都立即決定催生，同時佢地已經提我，催生過程會好長好痛，不繼叫我考慮無痛分娩....
我一直都唔想用無痛，所以最初只選擇聞氣，10點正式落藥，由2度藥開始，果時大約5-10分鐘痛一次，細痛唔長，我就一直唔聞氣，姑娘就成日提我痛就聞唔好忍，到第一段探病時間，老公黎睇我，我果時仲算忍到下痛，但因為我個子宮仲未有動靜，落藥度數加到8度，keep住約3分鐘痛一次，每次痛過30秒

老公不繼咁講笑話引我笑，分散我注意，果時都仲識笑，我再問姑娘進展，佢話我係痛好左但都未有任何進展，1度都冇......老公走左後再加藥，去到16度，開始約1分鐘痛一次...醫生同姑娘再建議我用無痛，我最後揀左打止痛針，打針後4個鐘後bb出世，bb要打解針，因評估過我有排先生得，所以打第一支，打完真係痛少好多，仲可以恰返陣，由於我催生都生唔到最後有機會開刀，因此一定要禁飲食，個人真係好攰

到老公再黎睇我時，止痛無效了，子宮只係薄左仲未開，落藥keep住16度，醫生再評估，打第二支止痛，果時繼續1分鐘痛一次.....但呢支針已經無乜用，約夜晚8點落藥加到32度，半分鐘大痛一次，再問醫生都話冇乜進展，我已經痛到就黎崩潰，因為都未開夠3度，仲可以用無痛，最後決定用，打無痛果時我唔覺得痛，因為大痛真係好密好利害，反而打無痛後突然有進展，9點左右去到6度，姑娘幫我call老公黎陪產，唔知係咪突然進展得咁快，無痛對我黎講一點作用都無.....

10點幾開始感覺到有野想衝出黎咁，我問姑娘係咪生得，佢係咁話等埋你老公先啦....我個心係咁叫...老公你快D黎啦，老公黎到準備好後我再問姑娘我係咪可以生，但都未得...等到大約10點50分正式生，推左幾下，搭正十一11點bb就出世了，簡直係大解脫..

姑娘不繼話我算叻，忍左咁耐先用無痛，但我一直以為自己可以忍得到，但無諗過催生係咁辛苦，人地正常半分鐘痛一次就黎生得，我都仲要等多3個鐘先有進展....不過幾痛幾辛苦都好，生完Edwin出黎聽到佢喊，真係由心笑出黎，之後姑娘問我抱唔抱亞仔，我當然話好啦，老公仲話我淨係掛住個仔，自己都未搞掂

本來姑娘話等我聯針後幫我地影全家幅，但因為我穿18個鐘之後Edwin先出世，醫生怕佢受感染，所以要立即入特別兒童病房觀察，咁就錯過左我地第一張全家幅啦，聯針後係度等上病房都等左好耐，老公又陪左仔仔上病房，搞到差唔多凌晨1點先可以上產後病房，上到病想食少少野啦，但我諗藥效未過，有d想嘔...所以最後都係選擇訓覺。

微針療程

之前為左結婚時可以有個最好狀態
加上我面上有少少粗大毛孔同埋雀斑
因此就試做微針療程
HAHA...表妹係美容師，因利成便....我每次都叫佢上黎我家幫手
我諗我大約做左8次療程左右啦
每次做完都覺得皮膚真係滑左同埋有彈性左
第三四次開始慢慢覺得D斑開始淡添
如果唔係有左BB我一定會繼續做

依家我都諗住唔再餵人奶後開始做返
慶幸o既係我陀Edwin冇為我帶來妊娠紋咋
如果唔係就要做埋個肚啦
表妹依家開始做freelance，大家有興趣o既可以去佢網址睇下
或者pm我拎佢contact

表妹blog: http://hk.myblog.yahoo.com/phoebe-mts

我之前的微針療程分享:
微針 x 5 times
獎勵自己之大出血
微針美容

大肚相 @ Studio 123 完成篇

要一路追返d未打o既blog呀
其實d相係20/5已經拎到手，一直懶update :p
同大家share下呀
我自己幾鐘意，睇返d相先發覺
我真係肥左好多呀~~~

呢條裙o既相影得我最肥 >0<

果時影pre-wedding已經諗住著波衫
但無著到，今次補返數，估唔到我仲著到件衫....哈哈

我反而鐘意著比堅尼o既相多d~~
獻醜啦~

最後就係白紗look ^^

我買走晒所有相，total都係用左我千六蚊
我覺得好抵呀