入院加手足口病 @ 26W

今胎其實總算黎講，都比上胎陀得辛苦
一來，我前期嘔得好利害
二來，我病過幾次
有兩次都係腸胃炎，不過好彩尚算輕微
未嚴重到要食藥入院等等

但....最慘的來了
將近結婚5週年紀念，我安排好晒去邊度食飯慶祝
早一日，食完個早餐突然嘔到痴肺
我以為個早餐問題啦
之後一直唔多舒服，又無胃口咁

做好手頭工作就打道回府
本來都好似無乜野架
但回家中途已經開始有d唔對路
想暈想暈咁，但都撐住買少少野食再返家
返去就訓，訓前度一度，當然38.1度 (微燒)

點知訓醒好似都唔好，再度去到38.6度
開始驚驚地，因為陀bb如果發高燒，好怕影響bb
所以立即call老公返家接我入院
我又蠢左，成日以為大肚婆都要去急症室先
係急症坐左作個幾鐘先轉介我過產房駁機監察
最後退左燒都繼續留院到第二日出院

返到家，手同腳有d疹出現，起初第一個反應係
乜醫院咁污糟架，有蚤咬
但第二日就覺得唔對路啦，點解會痛呢
最後比朋友望下，大家一致認為係手足口病
叫我再入院睇下
就係咁...我係懷孕26W確診左手足口病
唉，不幸中的大幸係朗朗無事
但我地要隔離一星期直至我好返為止

手足口病係無藥食的，d疹出晒就會謝，然後脫皮
但頭果幾日，真係好陰公
d疹好痛，痛嘅程度，係令我好攰好眼訓，訓左都會痛醒
真係忍唔到喊出黎呀
好彩仲有老公陪我
病一病，我輕左幾磅
好彩都無影響到亞囡，佢依舊keep住中碼，果然叻叻