濕疹BB護理

其實之前都提及過朗朗約三個月開始發現有BB濕疹

我上網睇過資料BB濕疹一般在1-3月的嬰兒身上出現，到左6個月之後，濕疹情況應該會慢慢舒緩落黎，大部分BB濕疹到兩歲時就會完全康復，當然亦有另外的例子啦。

知道朗朗有濕疹，真係周圍search下成因，有咩要注意，搽咩藥會好d.....

第一次同朗朗去食"輪狀病毒口服劑"時，順便叫醫生睇下啦，醫生即時開左類固醇比佢搽，果時都好掙扎
因為我知道一搽左後，有機會會依賴左佢
但聽到不少媽媽分享，如果濕疹惡化但我唔用藥去控制的話
會越來越嚴重，所以應該先用藥減輕病情然後再做好保濕程序
但可能呢個醫生唔係皮膚科醫生啦，朗朗用左佢d藥後好似冇乜作用
之後媽咪就帶朗朗去睇我細過時睇開的醫生，佢專科係皮膚
其實佢都係開類固醇比朗朗用，但另外再開一隻保濕用的cream (Ezerra)
當情況好左之後搽cream就ok
效果幾好，所以果時我就周圍去搵下呢隻cream邊度有得買

踏入冬天，天氣乾燥會令濕疹bb的皮膚更加乾旱
朋友話我知呢個時候，朗朗唔可以用一般的沖涼液啦
要轉用淋浴油，我就揀左愛麗她 Oilatum比朗朗試
初時心急想快d幫朗朗轉用，走去萬寧買啦....
嘩!!! 後來先知貴好多囉
萬寧價: $16x
護協價: $14x
藥房價: $12x

雖然淋浴油的價錢比一般沖涼液貴，但有咩辦法喎，為左令朗朗冇咁辛苦 (因為會痕，佢會R)，貴貴都要買啦

慢慢，朗朗濕疹的情況開始好D，但有時都係時好時壞
可能天氣問題啦
後來，朗朗姨婆有朋友個濕疹BB用過一隻cream (無藥性)，覺得唔錯，又介紹比我試用
就係Rosebud Smith的花蕾霜，原來呢個品牌係美國好多年架o勒
香港o既代理係小赤足，多買會抵d
又真係幾好用喎，但主要係滋潤，唔多止痕 (因為我見朗朗搽完後有時都仲有R)
所以我只係會係訓左後搽係患處，第二朝起身好多時都會好返好多

仲有，原來有濕疹的BB，通常都好易有哮喘或者鼻敏感
加上遺傳 (baba有鼻敏感)
見朗朗流左鼻水幾日，就叫婆婆再帶佢睇醫生
醫生話朗朗應該有鼻敏感
我知道果下真係好唔開心，係咪因為我o既問題呢
當然後來知道係遺傳問題我先放下心
醫生開左一個星期藥比朗朗食，佢話食完呢個療程之後
除左鼻敏感會舒緩，濕疹都會好返好多

估唔到真係喎，依家朗朗只係間中有少少濕疹出現
面仔變得滑嘟嘟，靚仔左好多
當然我唔可以鬆懈啦，仍然繼續幫佢做好保濕程序
依家主要搽花蕾霜 / Ezerra
希望朗朗d濕疹可以快d斷尾啦

各位媽媽，如果你地bb都有濕疹問題，記得小心處理呀!!!