11月3日 (8w4d)

尋日睇完私家返到公司已經同老闆講左好消息
由於健康院逢星期三收新症
打鐵趁熱，立即請埋呢日上午假去健康院登記
早一日已經電話預約左十點應診
我呢個大頭蝦
竟然聽漏左姑娘o既吩咐
一早去左登記後就同媽咪去食早餐 (最後發現留小便前係唔可以食野囉)
十點返到健康院等等等
第一件事就係驗尿，原來每次黎檢查都要自攜驗尿樽
今次第一次佢地可以借紙杯比我用
可能我食左早餐，出黎結果好似有少少蛋白尿 (立即嚇一嚇)
姑娘叫我再飲d水驗多次
後來就去聽一個小講座
講解返產檢、生孕及其他有用資料
然後就見護士長，紀錄我o既病歷同埋家庭背景
再次驗小便，好彩過關
跟住就係見醫生
最後就係抽血，呢日一共抽左4支血
用作不同o既檢查
由於健康院係無超聲波架
所以今日無見到小B
健康院亦都幫我約埋照OSCAR同埋第一次產檢o既時間
good~~~月底就可以照OSCAR
希望我同小B加油，順利pass啦 ^^