婚禮後記 - 姊妹裙 - POP Corners

為怕各姊妹好似我咁
搞到結婚前一日都仲煩緊呢個item
我都決定要公開呢間舖出黎

姊妹裙 - POP Corners (百利3樓)
評分: 10分  (100分最高) 相關blog: 伴娘 & 姊妹裙其實一直好想係Joy Marry買姊妹裙
但奈何眼角高o既表妹睇唔岩
去過好多間都睇唔岩
偏偏比我地揀到一間搞到我差d嘔血o既舖頭
除左伴娘之外
我仲有3個姊妹係度訂左裙
9月頭終於有貨拎啦
由於我公司好多野搞
所以叫班姊妹自己上去先我遲d先到
點知一路做野，一路接到電話
佢地話我知......大件事，貨不對辦
果時我係電話已經聽到果邊好似嘈晒交咁
我又未走得喎，已經搞到好唔開心
拿拿聲整好d野即閃

去到老板娘唔係度，得個"亞毛" (容許我咁叫佢，因為呢個人真係好討厭)
呢個"亞毛"d態度差到痺
不斷重複話.........講過架啦，改衫要加錢
但個問題係，明明之前我表妹試果個size係fit晒身
家陣做出黎係大成個碼有多
我表妹都冇瘦過
咁即係專登做大要收我改衫錢啫
呢個"亞毛"繼續重複佢果一句
我都唔想同佢傾，佢同我講老板娘返緊
好...我等
老板娘返黎已經say 晒 sorry咁
態度都好好，我已經下左條氣
好聲好氣咁同佢傾
話佢個staff對我d朋友好差，搞到d氣氛咁
佢都立即話個"亞毛"
之後老板娘肯將完全唔對辦o既兩條裙退返錢比我
當時我都諗....唉...算數啦，佢個staff衰啫
另外一條就要送返廠改，另一條等個fd拎gridle過黎再試清楚洗唔洗改

好o勒，改好條裙返黎再試身
我呢個表妹可能真係瘦左啦，著埋gridle後都好鬆
所以我都決定加錢改
我個fd果條個size因為真係同個sample有分別，所以佢free幫我改
等到大婚前3日先有得拎
我個fd諗住度晒身去改，問題不大，又因為佢趕時間
拎完無試就走
點知.......佢返到家發現.....條裙比個師傳改爛左
仲要細到拉唔埋拉鍊
第二日 (大婚前兩日) 再同個fd去間舖，佢初初仲諗住叫我fd揀過條現成走
但揀唔到我叫佢退錢
咁佢都肯退
我仲馬上去pick up埋細表妹條裙
漏夜拎去比佢試
果然.....都係唔岩著.......細到拉唔埋
大婚前一日我馬上同細表妹買過另一條裙 (已經唔想打去呢間舖頭住了)
後來老板娘都有叫佢個同事打黎跟進 (上次個"亞毛"已經比佢炒左)
我簡單咁講左件事比佢知，但由於太忙我話遲d再同老板娘傾
點知老板娘好快打黎同我講話我應該拎返條裙返去再改
我真係有少少火，你明知我第二日結婚，點可能仲有時間再改
後來佢都肯退左半條裙o既價錢比我 (佢話因為佢冇收我改衫錢，而且條裙造好左)
之後再補個sms黎道歉

最後我造4條裙，退晒4條
你問我佢係咪黑店，我又唔會咁講
起碼佢肯退錢，加上態度都好o既 (可能怕比唱卦)
但問題係，咁趕o既時候，你退返錢比我都可能無用
呢件事真係令我心力交瘁
最後有兩條裙都係去返Joy Marry買 (一早係度揀到咪好囉.........唉)
希望其他JM唔好好似我咁
搞到一鑊粥